جاس قىز وزىنە تاپ بەرگەن اكۋلاعا تويتارىس بەردى

استانا. قازاقپارات - فلوريدا جاعالاۋىندا (ا ق ش) 17 جاسار قىز اكۋلا شابۋىلىنان امان قالدى.

بۇل تۋرالى The Huffington Post باسىلىمى 4- ساۋىردە حابارلادى.

وقيعا دەستين قالاسىنىڭ جاعالاۋىندا بولعان. وندا كەنتۋككي تۇرعىنى كەيتلين تەيلور (Caitlyn Taylor) اناسىمەن جانە دوستارىمەن دەمالۋعا بارعان.

تەڭىزگە ءتۇسىپ، تەرەڭدىگى بەلۋاردان كەلەتىن جەردە جۇزگەن قىز وزىنە قاراي تولقىننىڭ جاقىنداپ قالعانىن بايقاعان. دەلفين دەپ ويلاعان قىز جاعاعا اسىققان. الايدا، ول دەلفين بولماي شىقتى، ءجۇزىپ كەلگەن اكۋلا تەيلوردىڭ اياعىنان باس سالعان.

اكۋلادان قۇتىلۋ ءۇشىن تەيلور ونىڭ تۇمسىعىنان سوققان. سونىڭ ارقاسىندا جىرتقىش بالىقتىڭ جاعى اشىلىپ، شەگەدەي تىستەرى قادالعان اياقتى بوساتقان. اكۋلا تىستەرى قىز اياعىنىڭ التى جەرىنە تۇيرەلگەن. دارىگەرلەر 80 جەردەن تىگىس سالدى.