الەمدەگى ەڭ بيىك جەكە ءزاۋلىم ءۇي ساتىلىمعا شىعارىلدى

استانا. قازاقپارات - اريزونا شتاتىنىڭ (ا ق ش) پرەسكوتتە قالاسىندا ءبىر وتباسىنا ارنالعان الەمدەگى ەڭ بيىك ءۇي ساتىلىمعا شىعارىلدى.

1990-جىلدارى سالىنعان 10 قاباتتى رەزيدەنتسيا «سۇڭقار شىڭى» (اع. Falcon Crest) دەپ اتالىپ كەتكەن، ونىڭ قۇنى 1,5 ميلليون دوللار بولىپ بەلگىلەندى، دەپ حابارلادى Toptenrealestatedeals.com پورتالى.

ءۇيدىڭ بيىكتىگى 38 مەترگە دەيىن جەتەدى. ءزاۋلىم ءۇيدى جەرگىلىكتى سۋكۋمار پول ءوزى مەن جانۇياسىنا ارناپ، 1994-جىلى تۇرعىزعان. تەرەزەدەن تاۋدىڭ اسەم كورىنىسىن كورۋگە بولادى.

كورۋ راديۋسى اشىق كۇندە 120 ميل نەمەسە 200 شاقىرىمدى قۇرايدى. «سۇڭقار شىڭى» الەمدەگى ەڭ بيىك قانا ەمەس، ەڭ فۋتۋريستيكالىق ءۇي بولىپ سانالادى.

10 قاباتتى ۇيدە 3 جاتىن بولمە، ءتورت جۋىناتىن بولمە، اۋماعى 185 شارشى مەترلىك كۇنگە قىزدىرىناتىن ورىن، اس ءۇي مەن كەڭ قوناق بولمەسى بار. عيماراتتىڭ جالپى اۋدانى - 576 شارشى مەتر.

ءزاۋلىم سارايدا گاراجدان التىنشى قاباتقا دەيىن كوتەرىلەتىن ليفت جۇمىس ىستەيدى. نىساندى ساتۋمەن اينالىسىپ جاتقان Sotheby's International Realty اگەنتتىگىنىڭ بروكەرلەرى عيماراتتى زەرتحانا نەمەسە كەڭسە رەتىندە پايدالانۋعا بولاتىنىن ايتۋدا.