شولگە شىداماعان جىلان ادامداردىڭ قولىنان سۋ ءىشتى - كەسكىن

استانا. قازاقپارات - ءۇندىستاننىڭ وڭتۇستىگىندەگى كايگا اۋىلىنىڭ تۇرعىندارى اپتاپ ىستىقتان قاتتى شولدەگەن كورولدىك ءابجىلانعا پلاستيك بوتەلكەمەن سۋ بەردى.

بۇل تۋرالى Lenta.ru Daily Mail گازەتىنە سىلتەمە جاساپ حابارلادى.

بيىل ءوڭىردى قۋاڭشىلىق جايلاعان جانە 3,5 مەترلىك الىپ جىلان ەلدى مەكەنگە سۋ ىزدەپ كەلگەن. ۋلى جىلاننان قاۋىپتەنگەن تۇرعىندار ونىڭ قۇيرىعىنان ۇستاپ تۇردى جانە جىلان ۇستايتىن قۇرالداردى ازىرلەپ قويدى. ءبىراق، باۋىرمەن جورعالاۋشى ەشكىمگە شابۋىل جاساعان جوق جانە ادامدارعا جاقىنداپ، پلاستيك بوتەلكەدەن سۋ ءىشتى.

كەيىنىرەك ونى جەرگىلىكتى جابايى اڭداردى قورعاۋ ورتالىعىنا تابىستادى. كورولدىك ءابجىلان نەمەسە گامادرياد - ءۇندىستان، پاكىستان، يندونەزيا مەن فيليپپيننىڭ تروپيكالىق ورماندارىن مەكەندەيتىن ەڭ الىپ ۋلى جىلانداردىڭ ءبىرى.

وتىز جىلعا جۋىق ءومىر سۇرەتىن ءابجىلاندار ءومىرىنىڭ سوڭىنا دەيىن وسە بەرەدى. نەگىزگى قورەگى - وزگە جىلاندار مەن كەمىرگىشتەر. ءۇندىستاندا جىل سايىن جىلان شاققان 50 مىڭعا جۋىق ادام مەرت بولادى.