بەيجىڭدە وتەتىن فەستيۆالگە «قۇنانباي» جانە «جاڭعاق تال» فيلمدەرى قاتىسادى
ش. ايمانوۆ اتىنداعى «قازاق فيلم» ا ق جارىققا شىعارعان «قۇنانباي» جانە «جاڭعاق تال» فيلمدەرى قىتايدىڭ استاناسىندا 19-21- ساۋىردە وتەتىن بەيجىڭ حالىقارالىق كينوفەستيۆالىنىڭ (Beijing International Film Festival) (پانوراما) باعدارلاماسىندا كورسەتىلەتىن بولادى.
«فيلم كوپتەگەن فەستيۆالدەرگە قاتىسىپ، تانىلىپ جاتقانىنا وتە قۋانىشتىمىن. كارتينانىڭ جەلىسى مەيىرىمگە تولى، سوندىقتان دا قىتايلىق كورەرمەندەردىڭ كوڭىلىنەن شىعاتىنىنا سەنىمدىمىن»، - دەدى «جاڭعاق تال» فيلمىنىڭ رەجيسسەرى ەرلان نۇرماعامبەتوۆ.
ەستەرىڭىزگە سالا كەتسەك، «جاڭعاق تال» فيلمى وڭتۇستىك كورەياداعى پۋسان فەستيۆالىندە الەمدىك پرەمەراسىن وتكىزىپ، وندا New Currents (جاڭا اعىم) سەكسياسى اياسىندا باس جۇلدەنى يەمدەنگەن بولاتىن. سونىمەن قاتار، اتالعان كارتينا ۆەزۋلدەگى ازيا كينولارى 22-حالىقارالىق كينوفەستيۆالىنىڭ (فرانسيا، 2016-جىلى) نەگىزگى بايقاۋىندا كورسەتىلىپ، ەكى بىردەي جۇلدەگە: حالىقارالىق قازىلاردىڭ ارناۋلى جۇلدەسىنە جانە كينو سىنشىلارىنىڭ ارناۋلى جۇلدەسىنە يە بولعان.
«وسىدان بىرنەشە جىل بۇرىن مارقۇم تالاسبەك اسەمقۇلوۆ ەكەۋىمىز «ءبىرجان سال» فيلمىمەن قىتايعا ارنايى بارىپ ەدىك. كورسەتىلىمگە 500 گە جۋىق حالىق قاتىستى، ولاردىڭ اراسىندا قازاقتار دا بولدى. فيلمدى وتە كەرەمەت قابىلدادى. تاريحتان سىر شەرتەتىن «قۇنانباي» فيلمىمىز دە قىتايلىق كورەرمەندەرگە ۇنايدى دەگەن ويدامىن»، - دەدى «قۇنانباي» فيلمىنىڭ رەجيسسەرى دوسحان جولجاقسىنوۆ.
ۇلى ويشىل ابايدىڭ اكەسى قۇنانباي وسكەنباي ۇلىنىڭ ءومىرى جايلى باياندايتىن تاريحي تۋىندى ەلىمىز بويىنشا پروكاتقا 2015-جىلى شىعىپ، كورەرمەننىڭ كوزايىمىنا اينالعان بولاتىن. اتالمىش فيلم ق ر پرەزيدەنتى ن. ءا. نازاربايەۆتىڭ جانە مەملەكەت تاراپىنان دا جوعارى باعاسىن الدى.
2016-جىلدىڭ ادەبيەت پەن ونەر سالاسى بويىنشا مەملەكەتتىك سىيلىقتى ەلباسى ق ر تاۋەلسىزدىك كۇنىن تويلاۋ قارساڭىندا فيلمنىڭ ءتۇسىرۋ توبىنا بەردى. جارلىققا سايكەس سىيلىق رەجيسسەر دوسحان جولجاقسىنوۆقا، قويۋشى سۋرەتشى رۋستام ودينايەۆقا، سونىمەن قاتار اكتەرلەر نۋرسيفات سالىقوۆا مەن ايدوس بەكتەمىرگە بەرىلدى.
سونىمەن قاتار، العاشقى ۇلتتىق «تۇلپار» كينوسىيلىعىندا فيلمنىڭ اۆتورلارى ۇزدىك اتانىپ، «ۇزدىك ەر ادام ءرولى»، «ۇزدىك قويۋشى سۋرەتشى»، «ۇزدىك كومپوزيتور»، «ۇزدىك سەناري» اتالىمدارى بويىنشا ءتورت بىردەي جۇلدەگە قول جەتكىزدى.
ودان بولەك، ۋفادا وتكەن III حالىقارالىق ۇلتتىق جانە ەتنيكالىق كينو «كۇمىس اقبوزات» فەستيۆالىندە ءامىر ءابدىرازاقوۆ اتىنداعى «ۇلتتىق رۋح» جۇلدەسىن يەلەنگەن.
ايتا كەتەيىك، بەيجىڭ حالىقارالىق كينوفەستيۆالى قىتايدىڭ بايلانىس، راديو، كينەماتوگرافيا جانە تەلەارنالار باس باسقارماسى جانە بەيجىڭنىڭ مۋنيتسيپاليتەتىنىڭ حالىق ۇكىمەتى، سونداي-اق قىتايدىڭ كينو جونىندەگى باسقارماسىنىڭ ۇيىمداستىرۋىمەن وتكىزىلەدى.
بايقاۋ ۇيىمداستىرۋشىلارىنىڭ ايتۋىنا قاراعاندا، بەيجىڭ فەستيۆالى جىلدان جىلعا دامىپ، بۇگىندە ازيادا ءوتىپ جاتقان كينوفەستيۆالدەردىڭ كوشىن باستاپ تۇر. بيىل بايقاۋعا 90 ەلدەن 1000 عا جۋىق كينوتۋىندى قاتىسىپ وتىر. ولاردىڭ ىشىنەن نەگىزگى باعدارلاماعا 15 فيلم ىرىكتەلىپ الىنعان. كونكۋرستىق بايقاۋعا ۇسىنىلعان فيلمدەردىڭ ۇزدىگىن بەلگىلى دات رەجيسسەرى بيلل اۆگۋست ءتوراعالىق ەتەتىن حالىقارالىق قازىلار القاسى انىقتايتىن بولادى.
