قاراعاندىدا سۋ اعىزىپ اكەتكەن اعايىندى جىگىتتەردى تىكۇشاقپەن ىزدەپ جاتىر

قاراعاندى. قازاقپارات - قاراعاندى وبلىسى قارقارالى اۋدانى قوپا وزەنى ماڭىنداعى سۋ تاسقىنى كەزىندە ءىز-ءتۇزسىز جوعالعان اعايىندى جىگىتتەردى ىزدەۋگە تىكۇشاق بەرىلدى، دەپ حابارلايدى «قازاقپارات» ح ا ا ءتىلشىسى.

قاراعاندى وبلىسى ت ج دەپارتامەنتى باسشىسىنىڭ ورىنباسارى مۇرات قاتپانوۆتىڭ حابارلاۋىنشا، ەرىگەن قار سۋلارىنان قوپا وزەنىنىڭ سۋى ارناسىنان اسىپ كەتكەن.

«قوپا وزەنىنىڭ ارناسى تىكۇشاقپەن تەكسەرىلدى. وقيعا ورنىندا قۇتقارۋشىلار جۇمىس ىستەۋدە، ەكى تەحنيكا جانە تىركەمەسى بار قايىق بەرىلدى. قاردىڭ ەرۋىنەن وزەن ۇلعايا ءتۇستى، اعىن كۇشەيدى، سول سەبەپتى ىزدەۋ جۇمىستارى اسا كۇردەلى جاعدايدا وتۋدە»، - دەپ حابارلادى قاراعاندى وبلىسى ت ج دەپارتامەنتىنىڭ باسپا ءسوز قىزمەتى.

ەر ادامدار ەلدى مەكەننەن تىس، جارلى كەڭشارىنان 500 مەتر جەردە جوعالعان. ەكىنشى ءساۋىر كۇنى تاڭەرتەڭ ولار كوپىر ارقىلى ءبىر ءۇيىر جىلقىنىڭ سوڭىنان كەتكەن. قايتار جولدا سالت اتتى ەكى اعايىندى قوپا وزەنى ماڭىنان وتكەن. ولارمەن بىرگە بولعان جەرگىلىكتى تۇرعىن جوعالعان ەكەۋدىڭ اتتارىمەن بىرگە وزەنگە قۇلاعانىن، اتتاردىڭ جاعاعا شىعىپ، ەر ادامداردىڭ سۋعا اعىپ كەتكەنىن ايتقان.