21:26, 04 - ءساۋىر 2017 | GMT +5
رەسەيدە پوليتسەيلەردى ءولتىردى دەگەن كۇدىكپەن ىزدەۋدە جۇرگەندەردىڭ ءبىرى اتىراۋدا ۇستالدى
استانا. قازاقپارات - قازاقستان رەسپۋبليكاسى ۇلتتىق قاۋىپسىزدىك كوميتەتى جانە ىشكى ىستەر مينيسترلىگى رەسەيلىك سەرىكتەستەردىڭ باعدارى استراحاندا پوليتسيا قىزمەتكەرلەرىن ولتىرۋگە قاتىسى بولۋى مۇمكىن رەسەي ازاماتتارىن تەكسەرۋدى جالعاستىرۋدا،
دەپ حابارلادى بۇگىن ق ر ۇلتتىق قاۋىپسىزدىك كوميتەتىنىڭ باسپا ءسوز قىزمەتى.
جۇرگىزىلگەن جەدەل ءىس- شارالاردىڭ ناتيجەسىندە ىزدەۋدەگى ادامنىڭ ءبىرى گيزاتوۆ اليبەك باتىربەكوۆيچ (قازاقستاننىڭ تۋماسى، 1990 -جىلى تۋىلعان) اتىراۋ وبلىسىندا تابىلدى. گيزاتوۆتىڭ ۆاحتالىق ادىسپەن كاسىپورىنداردىڭ بىرىندە جۇمىس ىستەۋ ءۇشىن رەسپۋبليكا اۋماعىنا بيىلعى جىلدىڭ 31 - ناۋرىزىندا كەلگەنى انىقتالدى. الدىن الا مالىمەتتەر بويىنشا ول قارۋلى شابۋىلعا قاتىسپاعان. قازىرگى كەزدە جاسالعان قىلمىسقا قاتىستىلىعىن انىقتاۋ ءۇشىن گيزاتوۆتى رەسەيلىك تاراپقا بەرۋ ماسەلەسى قاراستىرىلۋدا.
