جىن- ويناقتىڭ ورتاسىندا «ازان شاقىرعان» تۇنگى كلۋب جابىلىپ قالدى

 استانا. قازاقپارات - تۋنيستىڭ كۋرورتتىق قالاسى نابۋلدەگى تۇنگى كلۋبتاردىڭ بىرىندە يسلام دۇعالارىنان رەميكس جاساپ، جىن- ويناقتىڭ ورتاسىندا «ازان شاقىرعان» ديدجەي جۇرتتىڭ نارازىلىعىن تۋدىردى.

نارازى جۇرت تۇنگى كلۋبتاعىلار ەمەس، سول جەردەن تۇسىرىلگەن ۆيدەونى تاماشالاعان الەۋمەتتىك جەلى پايدالانۋشىلارى، دەپ حابارلايدى Baq.kz.

نابۋل قالاسىنىڭ گۋبەرناتورى مناۋار ۋەرتاني ءمالىم ەتكەندەي، جۇرتتى شۋلاتقان تۇنگى كلۋب ناقتى شەشىم قابىلدانعانشا جابىق بولادى. اتالمىش وقيعا بويىنشا تەرگەۋ جۇمىستارى باستالعان.

ونىڭ ايتۋىنشا، كلۋبتىڭ يەسى «مورالدىك نورمالاردى بۇزىپ، ادامگەرشىلىك قۇندىلىقتاردى اياق استى ەتكەنى ءۇشىن» قاماۋعا الىنىپتى.

«ءدىني نانىم مەن قادىر- قاسيەتكە قاستاندىق جاساۋعا جول بەرمەيمىز» ، - دەپ ءمالىم ەتتى ۋەرتاني.

Orbit Festival فەستيۆالىنەن تۇسىرىلگەن ۆيدەوجازبادا ەكى ەۋروپالىق ديسك- جوككەي بەس ۋاقىت نامازعا شاقىراتىن ازاننىڭ ەلەمەنتتەرى بار سەت اينالدىرادى. بۇل روليك الەۋمەتتىك جەلىدە ۇلكەن داۋ تۋدىرىپ، دۇيسەنبى كۇنى فەستيۆال ۇيىمداستىرۋشىلارى «فەيسبۋكتەگى» جەكە پاراقشاسى ارقىلى جۇرتتان كەشىرىم سۇرادى. بۇل اۋەنمەن ەشكىمنىڭ ءدىني نانىمىنا قيانات جاساپ، مازاق قىلۋ ويىمىزدا دا بولعان جوق دەپ اقتالدى ولار.

ال باسى داۋعا قالعان ديدجەيلەردىڭ ءبىرى Dax J: «مەنىڭ بىرەۋدى رەنجىتىپ نەمەسە نامىسىنا تيەمىن دەگەن وي ەشقاشان بولعان ەمەس» ، - دەپ ءمالىم ەتتى.