سانكت-پەتەربۋرگتەگى تەراكتىگە بايلانىستى قازاقستاندا قاۋىپسىزدىك شارالارى كۇشەيتىلدى

استانا. قازاقپارات - ق ر ۇلتتىق قاۋىپسىزدىك كوميتەتى سانكت-پەتەربۋرگتەگى تەراكتىگە بايلانىستى قاۋىپسىزدىكتى كۇشەيتتى، دەپ حابارلايدى قازاقپارات.

بۇل تۋرالى بۇگىن ۇكىمەت وتىرىسىنان سوڭ تىلشىلەرگە بەرگەن سۇحباتىندا ۇلتتىق قاۋىپسىزدىڭ كوميتەتى ءتوراعاسىنىڭ ورىنباسارى نۇرعالي بىلىسبەكوۆ ءمالىم ەتتى.

«مەن جاڭا ۇكىمەت وتىرىسىندا سانكت-پەتەربۋرگتتەگى قايعىلى وقيعا تۋرالى اقپارات جەتىسىمەن ءبىز بارلىق ۇلتتىق قاۋىپسىزدىك دەپارتامەنتتەرىنە جانە رەسپۋبليكا اۋماعىنداعى بارلىق كۇشتىك قۇرىلىمدارعا كولىك وبەكتىلەرىندە قاۋىپسىزدىك شارالارىن كۇشەيتۋ جونىندە تاپسىرما بەرگەنىمىزدى بايانداعان بولاتىنمىن»، - دەدى ول ۇكىمەت وتىرىسىنان كەيىن تىلشىلەرگە بەرگەن سۇحباتىندا.

ونىڭ سوزىنشە، قازاقستاننىڭ مەملەكەتتىك شەكاراسىندا تەكسەرىس رەجىمى قاتاڭداتىلىپ وتىر.

«ارينە، شەكارادا تەكسەرىستەر كۇشەيتىلەدى، الماتى مەتروپوليتەنىندە، كولىك نىساندارى، شەكاراداعى وتكىزۋ بەكەتتەرى - بارلىعىندا قاۋىپسىزدىك شارالارى قاتاڭداتىلادى. ءبىز كەز كەلگەن اقپاراتتى جەدەل تەكسەرۋ شارالارىن قولعا الدىق»، - دەدى ق ر ۇ ق ك باسشىسىنىڭ ورىنباسارى. ن. بىلىسبەكوۆ رەسەيدىڭ فەدەرالدى قاۋىپسىزدىك قىزمەتىمەن اراداعى بىرلەسكەن جۇمىستارعا دا توقتالدى.

سونىمەن قاتار ول سانكت-پەتەربۋرگتەگى تەراكتىگە قازاقستاندىق ازامات ماكسيم ارىشەۆتىڭ قاتىسى بار بولۋى مۇمكىن دەگەن اقپاراتتى جوققا شىعاردى.

ەسكە سالا كەتەيىك، 3- ساۋىردە سانكت-پەتەربۋرگ مەتروسىندا بولعان جارىلىستان 11 ادام قازا تاۋىپ، 45 ادام جاراقاتتانعان بولاتىن.

اۆتور: جاسۇلان جولدىبايەۆ