قازاقستاننان موڭعولياعا ۇشاق قاشان ۇشاتىنى بەلگىلى بولدى
ءوز جازباسىندا مينيستر وسى جىلى ەلىمىزدەن الەمنىڭ ءبىرقاتار مەملەكەتىنە جاڭا رەيستەر اشىلاتىندىعى تۋرالى بايانداعان.
«مينيسترلىك حالىقارالىق باعىتتارداعى اۋە تاسىمالىن ارتتىرۋ ماقساتىنداعى جوسپارلى جۇمىسىن جالعاستىرادى. وتكەن جىلى 7 حالىقارالىق باعىتتا اۋە رەيستەرى اشىلدى. ولار - استانادان امستەردامعا، الماتىدان سيان، شارم-ەل-شەيح جانە تەگەران قالالارىنا، اقتاۋدان باتۋمي جانە سوچي قالالارىنا، سونداي-اق، شىمكەنت-ىستامبۇل اراسىندا اشىلعان اۋە رەيستەرى. حالىقارالىق باعىتتاعى سۇرانىستار جىل سايىن ارتىپ كەلەدى. ماسەلەن، بيىل استانادا وتەتىن ەكسپو-2017 كورمەسىن وتكىزۋىمىزگە بايلانىستى، «استانا» حالىقارالىق قارجى ورتالىعىن دامىتۋعا بايلانىستى قازاقستان مەن ەۋروپا ەلدەرى اراسىندا شەتەلدىك اۋە كومپانيالارىمەن بىرلەسىپ جاڭا باعىتتار اشۋ جوسپارلانىپ وتىر»، - دەيدى مينيستر.
ونىڭ ايتۋىنا قاراعاندا 2017-جىلدىڭ 8- مامىرىندا پولشالىق LOT Polish Airlines اۋە كومپانياسى استانا-ۆارشاۆا باعىتىندا اپتاسىنا 4 رەت قاتىنايتىن جاڭا اۋە رەيسىن اشادى.
«سونداي-اق، استانا بۋداپەشت اراسىنداعى العاشقى اۋە قاتىناسى وسى جىلدىڭ 1- ماۋسىمىندا اشىلادى. كەشە ورتالىق جانە شىعىس ەۋروپاداعى ەڭ ءىرى لوۋ-كوست اۋە تاسىمالداۋشىسى Wizz Air اۋە كومپانياسى استانا مەن بۋداپەشت اراسىنداعى جاڭا اۋە قاتىناسىنىڭ ىسكە قوسىلاتىنىن جاريالادى. جاڭا اۋە قاتىناسى اپتاسىنا ەكى رەت، بەيسەنبى جانە جەكسەنبى كۇندەرى جۇمىس ىستەيتىن بولادى. بۇل - قازاقستان جانە ۆەنگريا اراسىنداعى ديپلوماتيالىق قارىم-قاتىناستاردىڭ 25 جىلدىعىنا وراي جاسالعان كەرەمەت تارتۋ.
19- ماۋسىمنان باستاپ FinnAir 2 اۋە كومپانياسى استانا-حەلسينكي باعىتىندا اپتاسىنا 2 رەت قاتىنايتىن جاڭا باعىتتى ىسكە قوسادى» - دەدى جەڭىس قاسىمبەك.
مينيستر بۇعان دەيىن قازاقستان مەن موڭعوليا اراسىنداعى وتە ۇلكەن سۇرانىسقا يە رەيستىڭ قاشان اشىلاتىنىن دا ايتتى.
«ماۋسىم ايىنان باستاپ استانا-بەيجىڭ باعىتىندا اپتاسىنا 3 رەت Air China ۇشاقتارى قاتىنايتىن بولادى. قازاقستاندىق اۋە كومپانيالار دا حالىقارالىق باعىتتار بويىنشا ءورىسىن كەڭەيتپەك. 2017-جىلدىڭ ماۋسىم ايىنان باستاپ «ەير استانا» استانا- ۋلان-باتور اراسىندا، «SCAT» اۋە كومپانياسى استانا-ەريەۆان اراسىندا جاڭا اۋە رەيستەرىن اشادى. «ەير استانا» اۋە كومپانياسى حالىقارالىق باعىتتا جاڭا اۋە رەيستەرىن اشۋ ءۇشىن ۇلكەن جۇمىس اتقارىپ جاتىر. 2019-جىلى استانادان سينگاپۋر مەن توكيوعا، 2020-جىلى شاڭحاي مەن نيۋ-يورك باعىتىنداعى جاڭا رەيستەر اشۋ جوسپارىندا بار» - دەدى ول ءوز جازباسىندا.
