ۇكىمەت باسشىسى ساعىنتايەۆ حالىقتىڭ تاۋەكەلشىل مىنەزىن تىيىپ وتىرۋعا تاپسىرما بەردى

استانا. قازاقپارات - ۇكىمەتتىڭ بۇگىنگى وتىرىسىندا ق ر پرەمەر-ءمينيسترى باقىتجان ساعىنتايەۆ كوكتەمگى سۋ تاسقىنى كەزىندە حالىقتىڭ تاۋەكەلشىل مىنەزىنە جول بەرمەۋ كەرەكتىگىن جەتكىزدى، دەپ حابارلايدى قازاقپارات ءتىلشىسى.

«ارينە، سۋ تاسقىنى باستالعالى بەرى ادامداردىڭ قايتىس بولعانى وكىنىشتى. ءيا، ونداي جاعدايلارعا سان الۋان سەبەپتەر تۇرتكى بولدى. دەگەنمەن، ءبىز ەسكەرتۋ جاسادىق. بۇعان دەيىن تالاي رەت اقىلداستىق. سوعان قاراماستان قازىرگى شارالار جەتكىلىكسىز دەپ ويلايمىن. ەگەر ءبىر جەردە سۋ تاسقىنى قاۋپى جوعارى بولسا، ەسكەرتۋمەن شەكتەلمەي، بىردەن باقىلاۋ بەكەتتەرىن ورناتىپ، جول قوزعالىسىن توقتاتۋ قاجەت. ادامدار «تاۋەكەل!» دەپ، جولعا شىعىپ كەتەدى. امان قالامىز دەپ ويلايدى. ادامنىڭ پسيحولوگياسى سونداي. جولعا شىعۋعا بولمايدى، دالادا قاۋىپتى دەپ قاتاڭ ايتپايىنشا... ەندى، ءبىز اپتا سايىن جينالىپ، وسى ماسەلەنى تالقىلاپ وتىرامىز. الايدا ادام شىعىنى بار. وتە وكىنىشتى...»، - دەپ اتاپ كورسەتتى ساعىنتايەۆ.

ايتا كەتەيىك، بۇگىنگى وتىرىستا ق ر ىشكى ىستەر ءمينيسترى قالمۇحامبەت قاسىموۆ كوكتەمگى سۋ تاسقىنىنا بايلانىستى قازىرگى جاعداي جايىندا بايانداپ، وسى ۋاقىتقا دەيىن بەس ادامنىڭ سۋعا كەتكەنىن جەتكىزدى.

اۆتور: ارمان اسقاروۆ