قازاقستاندا تۋعان نەمىس بوكسشىسى تۋرالى نە بىلەمىز؟
بۇل جولى ول شۆەتسيالىق ماريا ليندبەرگپەن جۇدىرىقتاستى. 10 راۋندتىڭ قورىتىندىسى بويىنشا تورەشىلەر 100-90, 100-90, 100-90 دەگەن باعا بەرىپ، ءبىراۋىزدان جەڭىستى كريستينا حاممەرگە بەردى.
40 جاستاعى شۆەتسيالىق بىلعارى قولعاپ شەبەرى ەكىنشى رەت قارسىلاسىنا ەسە جىبەرىپ وتىر. 19 جەكپە-جەگىنىڭ 15 ءىن جەڭىپ (سەگىز نوكاۋت)، ەكەۋىندە تەڭ تۇسكەن. ال كريستينا حاممەر WBO مەن WBC بەلبەۋلەرىنە يە.
ايتا كەتەيىك، حاممەر 1990-جىلى 16- تامىزدا قاراعاندى وبلىسىنداعى نوۆودولينكا ەلدى مەكەنىندە تۋعان.
بالا كۇنىندە وتباسىمەن بىرگە گەرمانياعا قونىس اۋدارىپ، قازىرگى ۋاقىتتا دورتمۋند قالاسىندا تۇرىپ جاتىر.
حاممەر بوكسپەن 15 جاسىنان بەرى اينالىسىپ كەلەدى. 20 جاسىندا كاسىپقوي بوكستان گەرمانيانىڭ ەڭ جاس چەمپيونى اتانعان. WBO جانە WBC بەلبەۋلەرىنىڭ يەگەرى. وعان ورتا سالماقتاعى تيتۋلداردىڭ باسىن قوسۋ ءۇشىن IBF جانە WBA جەتىسپەيدى. كريستينا حاممەر كاسىپقوي بوكستاعى دەبيۋتىن 2009-جىلدىڭ 12- قىركۇيەگىندە، ياعني 19 جاسىندا باستاعان.
وسى كۇنى گەرمانيانىڭ ماگدەبۋرگ قالاسىندا وتانداسى مەليسا كوكتەرمەن جۇدىرىقتاسىپ، ەكىنشى راۋندتا تەحنيكالىق نوكاۋتپەن جەڭدى.
ايتا كەتەرلىگى، مەليسا كوكتەر دە كاسىپقوي بوكستاعى العاشقى كەزدەسۋىن وتكىزگەن. حاممەرمەن جۇدىرىقتاسقاننان كەيىن ول شارشى الاڭعا مۇلدەم شىقپاعان. 2009-جىلدىڭ 24- قازانىندا گەرمانيانىڭ دەسساۋ قالاسىنداعى Anhalt Arena كەشەنىندە چەحيالىق ساركا ستوكلاسكوۆامەن قولعاپ ءتۇيىستىرىپ، تورەشىلەردىڭ شەشىمىمەن جەڭىسكە جەتتى.
ءدال سول جىلدىڭ 11- قاراشاسىندا بەرليندە سەربيالىق ماريا پەياكوۆيچتى ءتورتىنشى راۋندتا تەحنيكالىق نوكاۋتپەن ۇتتى.
كاسىپقوي رينگتە وسى ۋاقىت ارالىعىندا بارلىعى 21 كەزدەسۋ وتكىزىپ، ەشقايسىسىندا جەڭىلمەگەن. 2010-جىلدىڭ 23- قازانىندا كريستينا حاممەر امەريكالىق تەرەزا پەروتستسيمەن WBO- ءدىڭ بوس بەلبەۋى ءۇشىن كۇش سىناستى.
ون راۋندقا سوزىلعان ايقاستا تورەشىلەر حاممەردى جەڭىمپاز دەپ تانىدى. ال وتكەن جىلدىڭ قاراشا ايىندا امەريكالىق كالي رەيستى ون راۋندتىڭ قورىتىندىسى بويىنشا تورەشىلەردىڭ شەشىمىمەن جەڭىپ، WBC نۇسقاسى بويىنشا جاڭا الەم چەمپيونى اتاندى.
بۇگىنگە دەيىن قاراعاندى وبلىسىندا تۋعان بوكسشى WBO بەلبەۋىن توعىز رەت، WBC- ءدى ءبىر رەت قورعادى.
