ەلباسى سانكت-پەتەربۋرگتەگى جارىلىسقا بايلانىستى رەسەي حالقىنا كوڭىل ايتتى

استانا. قازاقپارات - نۇرسۇلتان نازاربايەۆ رەسەي فەدەراتسياسىنىڭ پرەزيدەنتى ۆلاديمير پۋتينگە كوڭىل ايتۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.

قازاقستان پرەزيدەنتى سانكت-پەتەربۋرگ قالاسى مەتروسىنداعى جارىلىس سالدارىنان ادامداردىڭ قازا بولعانى تۋرالى حاباردى زور كۇيزەلىسپەن قابىلدادى.

«بۇل وقيعا قابىرعامىزدى قايىستىردى، رەسەي فەدەراتسياسى حالقىنىڭ اۋىر قايعىسىنا ورتاقپىز»، - دەلىنگەن جەدەلحاتتا. مەملەكەت باسشىسى قازا بولعانداردىڭ تۋىستارى مەن جاقىندارىنا بارشا قازاقستان حالقىنىڭ جانە جەكە ءوزىنىڭ اتىنان كوڭىل ايتتى، سونداي-اق زارداپ شەككەندەردىڭ تەزىرەك ساۋىعىپ، وتباسىلارىنا ورالۋىنا تىلەكتەستىك ءبىلدىردى.