مەملەكەت باسشىسى ماڭعىستاۋ وبلىسىنا جۇمىس ساپارىمەن باردى

استانا. قازاقپارات - مەملەكەت باسشىسى نۇرسۇلتان نازاربايەۆ ازەربايجانعا جاساعان رەسمي ساپارىنان كەيىن بىردەن ماڭعىستاۋ وبلىسىنا باردى.

 ەلباسى اقتاۋ قالاسىندا بوي كوتەرگەن كوپ فۋنكتسيونالدى «ماڭعىستاۋ ارەنا» سپورت كەشەنىن ارالاپ، جەرگىلىكتى جاستار، تانىمال سپورتشىلارمەن كەزدەستى.

ماڭعىستاۋدا بۇل كۇندەرى جايما شۋاق جايلى كوكتەم. تەك ورتالىقتا قىزۋ قاربالاس. ءوڭىردىڭ شەندى- شەكپەندىلەرى بىرنەشە كۇننەن بەرى ەسەپ- قيساپتارىن دايىنداپ، كەم- كەتىكتەرىن تۇزەتىپ، جەتىستىكتەرىن كورسەتۋگە ازىرلەنىپ الەك. بارىنەن بۇرىن وبلىس اكىمىنىڭ جۇرەگى كۇپتى. بيلىك تىزگىنىن ۇستاعانىنا نەبارى جارتى اي بولعان ەرالى توعجانوۆ پرەزيدەنتتى مۇنايلى ولكەنىڭ تىنىس- تىرشىلىگىمەن تانىستىرۋى كەرەك. جاڭا اكىمىنىڭ ەسەبىن تىڭداماس بۇرىن مەملەكەت باسشىسى اقتاۋدا بوي كوتەرگەن كوپ فۋنكتسيونالدى «ماڭعىستاۋ ارەنا» سپورت كەشەنىنىڭ احۋالىمەن تانىستى.

 2014 -جىلى ىرگەتاسى قالانعان كەشەننىڭ اشىلۋىنا جەرگىلىكتى سپورت سالاسىنىڭ ۇزدىكتەرى مەن جالىندى جاستار جينالعان. پرەزيدەنت بايراقتى باسەكەدە نامىستى قولدان بەرمەي، كوپشىلىككە ۇلگى بولىپ جۇرگەن تانىمال سپورتشىلارمەن سۇحباتتاسىپ، جارىس جولىندا تەك جەڭىس تىلەدى. كەشەننىڭ جالپى اۋماعى 9 مىڭ شارشى مەتردەن اسادى. وندا جاستار بوز كىلەم ۇستىندە بەلدەسىپ، جەكپە- جەك شەبەرلىكتەرىن شىڭداپ، جەڭىل اتلەتيكاعا ارنالعان زالداردا جان- جاقتى شىنىعا الادى. قارسىلاستارىن قاپى قالدىرىپ، قاتارلاستارىنىڭ الدى بولىپ جۇرگەن ءوڭىردىڭ سپورتشىلارى بۇل كەشەندى كوپ كۇتتى. ەندى تەك تالاپ - ەڭبەك پەن جىگەردى جۇدىرىققا ءتۇيىپ، ءدۇبىرلى دودالاردا توپ جارۋ. «بولام» دەگەن بالانىڭ بەتىن قاقپاي، بەلىن بۋعان حالىقپىز عوي. سپورت -  ەلىمىزدە قولداۋدان كەندە ەمەس سالالاردىن ءبىرى. ال مۇنداي زاماناۋي نىساندار جالىندى جاستاردىڭ قاناتىن قاتايتارى ءسوزسىز.

سۇڭعات جۇباتحان، دزيۋدوشى:

 - كيەلى ماڭعىستاۋ جەرىندە «ماڭعىستاۋ ارەنا» عيماراتى اشىلىپ جاتىر. مەملەكەت تاراپىنان جاقسى جاعدايلار جاسالىپ، وسى جەرگە سپورتتىڭ قاي تۇرىمەن بولسىن اينالىسىپ، سپورتشىلار ءوزىنىڭ سپورتتىق دەڭگەيىن شىڭداپ، ودان ارى دامىتۋعا مۇمكىنشىلىك بەرىپ وتىر. مىنەكەي وسىنداي ماڭعىستاۋدىڭ جاۋىرىنى جەرگە تيمەگەن كوپتەگەن پالۋانىمىز بار. ايتا كەتەتىن بولساق، ايبەك يماشيەۆ سياقتى اعالارىمىز بار. ءبىز دە سولاردىڭ جولىن قۋىپ، الەمدىك دودالاردا ەلىمىزدىڭ كوك تۋىن كوككە جەلبىرەتىپ، ءانۇرانىمىزدى شىرقاتامىز دەگەن ۇمىتتەمىز.

دانا ءدارىباي، ارمرەستلينگ شەبەرى:

 - وسىنداي سپورت مەكتەبىنىڭ اشىلۋى -  ءبىز ءۇشىن، اسىرەسە سپورتشىلار ءۇشىن ۇلكەن قۋانىش. ويتكەنى بۇل قازاقستان ىشىندە ماڭعىستاۋدىڭ الەم اراسىندا قازاقستاننىڭ تۋىن جەلبىرەتۋگە ۇلكەن سەپتىگىن تيگىزەدى. وسىنداي سپورت مەكتەپتەرىنىڭ ارقاسىندا كوپتەگەن الەم چەمپيونى، ازيا چەمپيوندارى شىعىپ جاتىر. مەن وتە قۋانىشتىمىن.

كەشەندە سونداي- اق فۋتبول، باسكەتبول جانە ۆولەيبول الاڭدارى قاراستىرىلعان. قازىنادان ءبىر تيىن جۇمساماي تۇرعىزىلعان نىساندا سپورتشىلاردىڭ الاڭسىز جاتتىعۋىنا كەرەكتىنىڭ ءبارى بار. مەملەكەت باسشىسى تاراپىنان جاسالىپ وتىرعان قامقورلىققا ريزا بولعان ماڭعىستاۋلىق جاستار ۇكىلەگەن ءۇمىتتى اقتاۋعا ءسوز بەردى.

 اۆتورلارى: ەلدار باقپايەۆ، جاندوس بيتاباروۆ، جانۇزاق بورانبايەۆ

www.24.kz