قىتايداعى جەتەكشى قازاق كومپانيالارى مەديا سالاسىنىڭ بولاشاعىن تالقىلادى

استانا. قازاقپارات - ءۇرىمجى قالاسىندا قىتايدىڭ مەديا سالاسىندا وزىندىك ورنى بار جەتەكشى قازاق كومپانيالارى باس قوسىپ، زاماناۋي اقپاراتتىق ۇدەرىستەردى تالقىلادى.

«جاڭا ءداۋىر - جاڭا مەديا» تاقىرىبىمەن وتكەن شاعىن فورۋمدى شىنجاڭ تەلەراديو تورابى  ج ش س قازاق ءبولىمىنىڭ «باۋىرساق مەديا» جوباسى مەن ەلجاۋ مادەنيەت جانە كوممۋنيكاتسيا ج ش س (شاڭحاي) بىرلەسىپ ۇيىمداستىردى.

فورۋمعا «كۋا بول» ج ش س ديرەكتورى ىقىلاس ورازباي ۇلى، «جاس قىران» ج ش س ديرەكتورى ارىستانبەك نۇقان ۇلى جانە قىتاي ورتالىق تەلەۆيزياسىنىڭ شىنجاڭداعى تۇراقتى ءتىلشىسى سەنىم قاتىسىپ، جاستارعا قازاق ءتىلدى اقپارات سالاسىنىڭ دامۋى، بولاشاعى جانە نارىققا باعىتتالۋى جونىندە پىكىرلەرىمەن ءبولىستى.

شاراعا ءۇرىمجى قالاسىندا ءبىلىم الىپ جاتقان قازاق ستۋدەنتتەرى جانە ءار سالادا ەڭبەك ەتىپ جۇرگەن قازاق جاستارى قاتىستى.

قىتايدىڭ ءار جەرىندە ءبىلىم ىزدەپ جۇرگەن قازاق جاستارىنا، سونداي- اق، وزگە ۇلتتارعا قازاق مادەنيەتىن، تاريحىن جانە ءداستۇرىن ناسيحاتتاپ جۇرگەن ەلجاۋ مادەنيەت جانە كوممۋنيكاتسيا ج ش س ديرەكتورى ەرنۇر جۇماعالي ۇلى بۇل شارانى قىتايدىڭ بەيجىڭ، شاڭحاي جانە گۋاڭجوۋ سەكىلدى وزگە دە قالالارىندا وتكىزۋدى جوسپارلاپ وتىرعانىن جەتكىزدى.

ايتا كەتەيىك، 20 مىڭ ساعاتتىق قازاق تىلىندەگى كينو قورى بار «Bawrsak tv» ۇلتتىق قوسىمشاسىن پايدالانۋشىلار سانى بۇل كۇندە ميلليوننان اسقان. وعان قازاقشا تەلەارنا باعدارلامالارى، قازاق تىلىنە اۋدارىلىپ دۋبلياج جاسالعان شەتەلدىك كينوفيلمدەر مەن سەريالدار، سونداي- اق، «قازاقستان جۇلدىزدارى» ايدارىمەن اقىندار ايتىسىنىڭ ۆيدەولارى جۇكتەلگەن.

اۆتور: مۇحتار مۇرات