استاناداعى حالىقارالىق سوتتا بريتاندىق سۋديالار جۇمىس ىستەيتىن بولادى

استانا. قازاقپارات - «استانا» حالىقارالىق قارجى ورتالىعىنىڭ اربيتراج سوتىندا بريتاندىق سۋديالار جۇمىس ىستەيتىن بولادى.

 بۇل تۋرالى بۇگىن قازاقپارات تىلشىسىنە «استانا» حالىقارالىق قارجى ورتالىعىنىڭ باسقارۋشى ديرەكتورى ساياسات نۇربەك ءمالىم ەتتى.

بۇگىن جوعارعى سوت پەن «استانا» حالىقارالىق قارجى ورتالىعى قازاقستاندىق سۋديالاردى لوندوندا كاسىبي تاجىريبەدەن وتكىزۋ باعدارلاماسىمەن تانىستىردى. 2016 -جىلى جەلتوقساندا مامانداردى شەتەلدە دايىندىقتان وتكىزۋ رەسپۋبليكالىق كوميسسياسى جوعارعى سوت پەن «استانا» حالىقارالىق قارجى ورتالىعىنىڭ قىزمەتكەرلەرىنە لوندوندا Law Society باعدارلاماسى بويىنشا تاجىريبەدەن وتۋگە مۇمكىندىك بەرەتىن «بولاشاق» پرەزيدەنتتىك باعدارلاماسىنىڭ 15 ستيپەندياسىن تاعايىندادى.

 «ءبىرىنشى كەزەڭدە اتالمىش حالىقارالىق سوتتا قازاقستاندىق سۋديالار بولمايدى. تەك بريتاندىق سۋديالار قىزمەت ەتەدى. ازىرگە مامان سانى ەكى- ءۇش ادامنان اسپايتىن بولادى. سەبەبى باستاپقىدا ىستەر، سوت شەشىمدەرى كوپ بولمايدى. بۇل باعدارلاما ءوزىمىزدىڭ سۋديالاردان قۇرالعان نەگىزگى پۋلدى جاساقتاۋعا باعىتتالىپ وتىر. بۇل وتە كۇردەلى جۇمىس، سەبەبى بريتاندىق قۇقىق وتە ەرەكشە كەلەدى. سۋديالاردى دايىنداۋدىڭ ناقتى ءبىر جۇيەسى جوق دەۋگە دە بولادى. وعان ازاماتتىق، قىلمىستىق ىستەر بويىنشا جۇمىس ىستەپ جاتقان، ەڭ مىقتى، ەڭ تاجىريبەلى، ەڭ «تازا» زاڭگەرلەر الىنادى. ولار كەيىن سۋديالىققا الىنادى. سوندىقتان وزگە مەملەكەتتەردىڭ سۋديالارىنا تاۋەلدى بولماۋىمىز ءۇشىن، وسى باعدارلامانى باستاۋىمىز كەرەك، نەعۇرلىم ەرتە باستاساق، سوعۇرلىم جاقسى بولادى»، - دەدى ساياسات نۇربەك.

وتاندىق ماماندار لوندوندا التى ايلىق تاجىريبەدەن وتپەك. وندا اكادەميالىق جانە تاجىريبەلىك كەزەڭدەر ەنىپ وتىر. 10 اپتا تەوريا مەڭگەرگەننەن كەيىن، ولار  ۇلى بريتانيانىڭ ەڭ ۇزدىك زاڭگەرلىك جانە ادۆوكاتتىق كانتورلارىندا 5 اپتالىق تاجىريبەدە شىڭدالادى.

 ەسكە سالا كەتەيىك، ۇلت جوسپارىندا ق ر پرەزيدەنتى نۇرسۇلتان نازاربايەۆ استانادا ينۆەستيتسيالىق ماسەلەلەردى شەشەتىن حالىقارالىق اربيتراج ورتالىعىن قۇرۋدى تاپسىرعان بولاتىن. تەك اعىلشىن تىلىندە ءىس جۇرگىزەتىن قارجىلىق سوتتا انگلوساكسوندىق قۇقىق جۇيەسى قولدانىلادى.

 «قازىرگى ۋاقىتتا حالىقارالىق ساۋدا مەن قارجى جۇيەسىنىڭ ءتىلى - اعىلشىن ءتىلى. الەمدە كەلىسىمشارتتاردىڭ 80 پايىزى بريتاندىق قۇقىق اياسىندا جۇرگىزىلەدى. ينۆەستورلار ءوز مۇددەلەرىنىڭ ەڭ سەنىمدى قۇقىق جۇيەسى نەگىزىندە قورعالعاندىعىن ءبىلۋى ءۇشىن وسىنداي شارالارعا بارۋعا مىندەتتىمىز»، - دەدى ول.

اۆتور: جاسۇلان جولدىبايەۆ