ابايدىڭ ۇرپاقتارى تۋرالى

استانا. قازاقپارات -  اباي كاكىتايدى ون جاسىندا ءوزى بالا عىپ قولىن الىپ، سودان جيىرما ءتورت جىل يۋويى قاسىنجدا ۇستاپ، ءتالىم- تاربيە بەردى دەپ بۇرىن جازىلعان ەدى.

 ابايدىڭ ءوز بالاسى اقىلباي جاسىنان ۇلكەن اكە- شەشەسىنىڭ قاراۋىندا بولىپ، جاتباۋىر بوپ ءوستى. ەكىنشى ۇلى عابدىراحماندى جاسىنان ورىس مەكتەبىنە جىبەرىپ وقىتىپ، عىلىم جولىنا سالدى. ماعاۋيا جاسىنان ناۋقاستاۋ بولىپ، ءجۇرىپ- تۇرۋعا جارامسىزداۋ جىگىت بولدى. ەندىگى ابايدىڭ الىس- جاقىنى، دوس- جارىنا، ايتىس- تارتىسىنا جۇمسايتىن ادامى، كەرەگىنە جاراتقان بالاسى كاكىتاي بولدى. ونىمەن قابات ابايدىڭ ءبىر بەت قاعازعا جازىپ تاستاپ، ياكي اۋىزشا ايتقان ولەڭدەرىنە، قاراسوزدەرىنە كاكىتاي يەلىك جاساپ جيناپ، ساقتاپ وتىرعان. اباي، اقىلباي، ماعاۋيا ءتورت ايدىڭ ىشىندە ءولىپ، ولارعا قاراعان ون شاقتى اۋىل باسشىسىز، پاناسىز قالعان سوڭ بۇرىننان سول اۋىلداردىڭ ءوز ادامى بولعان كاكىتاي مال مەن جانعا يەلىك جاسادى.

 باتاوقىرىن، كەلىمدى- كەتىمدى كوپ قوناعىن، جاس بالا، جەرىس ايەلدەرىن، كورشى- قولاڭدارىنا باسشىلىق ەتتى. كەمشىلىك- تاپشىلىق كورسەتپەدى. ەندىگى اباي ارتىندا قالعان بالا- شاعاسىنىڭ باس كوتەرەر ۇلكەنى تۇراعۇل بۇرىن ءوزىنىڭ تۋعان شەشەسى ايگەرىمنىڭ از عانا داۋلەتىنە يە بولىپ، اباي مەن ماعاۋيا اۋىلدارىنا كەلىپ- كەتىپ قوناق رەتىندە عانا جۇرەتىن ەدى. ەندى اباي ولگەن جىلعى سايلاۋدا تۇراعۇلدى اعايىن- تۋعاندارى ابايدىڭ ميراسقورى عوي دەپ بولىس قويدى. كەڭسەسىن، ءتىلماشىن جيدەبايداعى ابايدىڭ اۋىلىنا ورنالاستىردى. تۇراعۇل بۇرىن ەسەلى قىستاۋ الا الماعان ەدى. جيدەبايدىڭ سولتۇستىك جاعىنداعى باراق دەگەن جەردەن ءبىر قىستاۋلىق جەر بەردى. كاكىتايدىڭ ەندىگى سەرىگى، اباي تۇقىمىنىڭ اتقا مىنەرى تۇراعۇل بولدى. تۇراعۇل جاس كۇنىندە ەسكىشە موللادان وقىپ، ارابشا حات تانىعان. ماعاۋيانىڭ قاسىندا بولىپ، وندا تاربيە الىپ، ورىسشا ءتىل ۇيرەنىپ، ورىس كىتاپتارىن وقىپ، ۇعارلىق ءبىلىم العان. ماعاۋيا تۇراعۇلدىڭ دومبىراعا، ءان- كۇيگە اۋەسىتىگىن بايقاپ، سەمەيدەگى ياكوۆ دەگەن سكريپكاشىدان اقى تولەپ ءبىر قىستاي مۋزىكا ۇيرەتتىرەدى. ورىستىڭ بىرنەشە كۇيلەرىن سكريپكادا تارتاتىن بولدى. مىسالى، «وديوپولكا» ، «شەستيكادرەل» ، «دۋنايسكايا ۆولنا» تاعى وسى سىقىلدى كۇيلەردى ۇيرەنىپ، قىرداعى اۋىلدارىنا كەلىپ ويناۋشى ەدى. دومبىرانى دا اسا شەبەر وينايتىن بولدى. قازاق كۇيلەرىن دە جاقسى بىلەتىن تۇراعۇل جاستىق تۋراسىنان بىرنەشە ولەڭ شىعارىپ جازىپ ءجۇردى. ءبىراق ونىسىن ۇقىپتى جينامادى.

ابايدىڭ ءوزى وتىرعان ۇلكەن ۇيىندە وسپان بالا عىپ العان اقىلبايدىڭ ورتانشى ۇلى اۋباكىر قالدى. اباي ءوز قولىندا 12 -جىل تاربيەلەدى. كوپ جول، جوبا كورسەتتى، ءبىراق ولەڭ ايتۋدان باسقا ونەر تابا المادى. اۋباكىردىڭ اقىندىق تالانتى وتە كۇشتى بولادى. ءار كەزدە كوزى كورىپ، كوڭىلى كەزگەن وقيعانى قولما قول اۋىزشا ولەڭ عىپ ايتىپ وتىراتىن ەدى. اسىرەسە، بىرەۋدىڭ كەمشىلىگىن، ءمىنىن ايتۋدا وتە شەبەر سىنايتىن بولعان.

 

Massaget.kz