ءابىليازوۆ ءىسى بويىنشا باستى سوت تالقىلاۋى باستالادى

استانا. قازاقپارات - بۇگىن الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارلىق سوتىندا قاشقىن بانكير مۇحتار ءابىليازوۆ پەن ونىڭ سىبايلاستارىنا قاتىستى باستى سوت تالقىلاۋى باستالادى، دەپ حابارلايدى قازاقپارات.

بۇعان دەيىن حابارلاعانىمىزداي، سۋديا قورعاۋشىلار تاراپىنىڭ الدىن الا سوت تىڭداۋىندا مالىمدەگەن ءوتىنىشىن قاناعاتتاندىرمادى. ءبىراق، سوتتالۋشى مامەشتىڭ قورعاۋشىسى ادۆوكات كليمەنكوعا قىلمىستىق ءىس ماتەريالدارىمەن تانىسۋعا رۇقسات بەرىلدى.

ەسكە سالا كەتسەك، 17- ناۋرىز كۇنى اتالعان قىلمىستىق ءىس بويىنشا الدىن الا سوت تىڭداۋى ءوتتى. باستى فيگۋرانت - مۇحتار ءابىليازوۆ بەلگىسىز سەبەپتەرمەن سوتقا كەلمەدى. وتىرىستىڭ بارلىق قاتىسۋشىلارى سوت تالقىلاۋىن ءابىليازوۆتىڭ قاتىسۋىنسىز وتكىزۋگە قارسىلىق بىلدىرگەن جوق.

ايتا كەتەيىك، ب ت ا بانكىنىڭ بۇرىنعى باسشىسى مۇحتار ءابىليازوۆ قازاقستاندا، رەسەيدە جانە ۋكراينادا بارلىعى 11 باپ بويىنشا ايىپتالدى. 2009-جىلدىڭ 6- ناۋرىزىندا ابىليازوۆكە حالىقارالىق ىزدەۋ جاريالاندى.

سەبەبى وعان جانە ول باسشىلىق ەتكەن قىلمىستىق توپقا سەنىپ تاپسىرىلعان مۇلىكتى يەمدەنگەندىگى جانە تالان-تاراجعا سالعاندىعى، الداۋ جانە سەنىمگە قيانات كەلتىرۋ ارقىلى بوتەن مۇلىكتى ۇرلاعاندىعى، زاڭسىز جولمەن تابىلعان اقشا قاراجاتتارىن زاڭداستىرعاندىعى، بانك قاراجاتتارىن زاڭسىز پايدالانعاندىعى، وكىلەتتىكتى اسىرا پايدالانعاندىعى جانە قىلمىستىق توپقا باسشىلىق ەتكەندىگى بويىنشا (قازاقستان رەسپۋبليكاسى قىلمىستىق كودەكسىنىڭ 176-بابى 3-بولىگىنىڭ «ب» تارماعىمەن، 176-بابى 3-بولىگىنىڭ «ا»، «ب» تارماقتارى بويىنشا، 24-بابىنىڭ 3-بولىگىمەن، 177-بابى 3-بولىگىنىڭ «ا»، «ب» تارماقتارىمەن، 193-بابى 3-بولىگىنىڭ «ب»، «ۆ» تارماقتارىمەن، 220-بابىنىڭ 1-بولىگىمەن، 228-بابىمەن، 235-بابى 3-بولىگىمەن قاراستىرىلعان) ايىپتار تاعىلعان بولاتىن.

بارىنشا كولەمدى جانە كۇردەلى قىلمىستىق ىستەردىڭ ءبىرى بولىپ تابىلاتىن بۇل قىلمىستىق ءىستىڭ كولەمى ەكى مىڭ تومنان اسادى جانە 150 دەن استام ەپيزودتان تۇرادى. ۇيىمداسقان قىلمىستىق توپتىڭ جاساعان ارەكەتتەرىنەن كەلتىرىلگەن شىعىننىڭ انىقتالعان سوماسى 7,5 ميلليارد ا ق ش دوللارىنان اسادى. قىلمىسكەرلەردىڭ ءىس-ارەكەتى تەك قازاقستان اۋماعىمەن عانا شەكتەلمەگەن، قىلمىستاردىڭ ەلەۋلى بولىگى قازاقستاندا باستاۋ الىپ، باسقا ەلدەر اۋماعىندا، سونىڭ ىشىندە رەسەي فەدەراتسياسى مەن ۋكراينادا اياقتالعان. ولار قىلمىستىق ارەكەتتەرىمەن ءتۇرلى شەتەلدىك مەملەكەتتەر مەن زاڭدى تۇلعالاردىڭ مۇددەلەرىنە نۇقسان كەلتىردى.

اۆتور: مارلان جيەمباي