جەتى بوكسشىمىز تايلاندتا «كورول كۋبوگى» ءۇشىن تالاسادى
ۇلتتىق قۇرامانىڭ باس باپكەرى مىرزاعالي ايتجانوۆ تايلاندتا 3- ءساۋىر كۇنى جالاۋى جەلبىرەيتىن دودادا جاس سپورتشىلارىمىزعا ءۇمىت ارتىپ وتىرعانىن ايتتى.
«كورول كۋبوگى» جارىسى ءبىر-ەكى جىلداي ۋاقىت وتكىزىلمەي قالعان ەدى. بيىل قايتا ۇيىمداستىرىلعالى وتىر. ءبىز بۇل دوداعا ءۇشىنشى نومەرلى بوكسشىلارىمىزدى اتتاندىردىق. بۇل ولاردىڭ تاجىريبە جيناۋىنا ۇلكەن مۇمكىندىك. ءبىراق، ىشىندە مىقتى، تالانتتى بوكسشىلار دا بار. ال نەگىزگى قۇرام ءساۋىر ايىنىڭ اياعى مەن مامىردىڭ باسىندا تاشكەنتتە وتەتىن ازيا بىرىنشىلىگىنە دايىندالىپ جاتىر»، - دەپ اتاپ ءوتتى باس باپكەر.
تايلاندتا قازاقستان نامىسىن قورعايتىن بوكسشىلار ءتىزىمى:
49 كەلىگە دەيىن - شالكار ايقىنباي
52 كەلىگە دەيىن - ازات ماحمەتوۆ
56 كەلىگە دەيىن - نۇربول قالجانوۆ
60 كەلىگە دەيىن - سۇلتان زاۋىربەك
64 كەلىگە دەيىن - قۋان قۋاتوۆ
69 كەلىگە دەيىن - سادريددين احمەدوۆ
75 كەلىگە دەيىن - ەرىك الجانوۆ.
اۆتور: كۇنسۇلتان وتارباي
