قازاقستان ازاماتتارىن ليتۆاعا كىرگىزبەي قويدى

استانا. قازاقپارات - ءۇش بالاسى بار يۋسۋپوۆتار اۋلەتىنە ۆيلنيۋستىڭ اۋەجايىنان ارى قاراي شىعۋعا تىيىم سالىندى.

ال ولاردىڭ ۆيزالارىن توقتاتتى، دەپ حابارلايدى قازاقپارات ءتىلشىسى.

قازاقستان ازاماتتارىن اۋەجايدىڭ جەرتولەسىندە 16 ساعات بويى ۇستادى. سىرتقى ىستەر مينيسترلىگىنىڭ وكىلدەرى ونى بۇقارالىق اقپارات قۇرالدارىنان ءبىلدى. سەبەبى اديليا يۋسۋپوۆانىڭ ءوزى ليتۆاداعى قازاقستان ەلشىلىگىنە حابارلاسقان جوق. شەكارا قىزمەتىنىڭ مالىمەتى بويىنشا، ءۇش بالاسى بار اديليا يۋسۋپوۆا ۆيلنيۋسكە ناۋرىزدىڭ 26 سى كۇنى ۇشىپ كەلگەن.

«قازاقستاننىڭ كونسۋلى اۋەجايدىڭ شەكارا قىزمەتىنە حابارلاسىپ، ماسەلەنىڭ ءمان-جايىن ءبىلدى. ءتولقۇجات تەكسەرىسى كەزىندە شەكاراشىلار ساپاردىڭ ماقساتى جايىندا سۇراعان ەكەن. شەنگەن ۆيزاسى الىنعاندا «ليتۆاداعى تۋريزم» دەپ كورسەتىلگەن ەدى. الايدا يۋسۋپوۆانىڭ قول جۇگىن تەكسەرگەندە ىشىنەن ارى قاراي گەرمانياعا ۇشاتىن اۋە بيلەتتەرى شىقتى. سول سەبەپتى وعان ليتۆاعا كىرۋگە تىيىم سالىندى. ازىرشە، بۇنىڭ ءبارى - الدىن الا اقپارات. ليتۆانىڭ شەكارا قىزمەتى بارلىق قۇجاتتاردىڭ كوشىرمەسىن كەلەسى اپتادا ءبىزدىڭ ديپلوماتتارىمىزعا بەرۋى ءتيىس»، - دەيدى مينيسترلىكتىڭ باسپا ءسوز حاتشىسى ءانۋار جايناقوۆ.

بۇدان بولەك، مينيسترلىك اديليا يۋسۋپوۆاعا كونسۋلدىق قىزمەت دەپارتامەنتىنە حابارلاسۋعا كەڭەس بەردى.

سول اقپاراتتىڭ نەگىزىندە ۆەدومستۆو ونىڭ قۇقىقتارىن قورعاي الادى. جالپى، مينيسترلىك بارلىق قازاقستاندىق تۋريستەردى ونداي جاعدايدا بىردەن قازاقستان كونسۋلىمەن بايلانىسۋعا ۇندەپ وتىر. ول ءۇشىن اعىلشىن تىلىندە «Please get in touch with the consul of the Republic of Kazakhstan»، ءيا بولماسا، ورىس تىلىندە «پروشۋ سۆيازاتسيا س كونسۋلوم رەسپۋبليكي كازاحستان» دەگەندى ايتۋ قاجەت. شەتەلگە شىققاندا ەلشىلىكتىڭ تەلەفونىن جازىپ العان دۇرىس. سونداي-اق مينيسترلىك سايتىنداعى ارنايى نۇسقاۋلىقپەن تانىسىپ شىققان ارتىق ەتپەيدى.

اۆتور: ارمان اسقاروۆ