اسىق اتۋ: كونە ۇلتتىق ويىننان كاسىبي سپورت دارەجەسىنە دەيىن

استانا. قازاقپارات - قازاق حالقىنىڭ ۇلتتىق ويىندارىنىڭ ءبىرى - اسىق اتۋ. تاۋەلسىزدىك جىلدارى ىشىندە اتا- بابامىزدان قالعان ءداستۇر قايتا تۇلەپ، كاسىبي سپورت دارەجەسىنە دەيىن كوتەرىلدى.

  بۇگىندە رەسپۋبليكا بويىنشا اسىق اتۋمەن تۇراقتى تۇردە اينالىساتىن سپورتشىلاردىڭ سانى 100 مىڭعا تايادى. قازاقپارات تىلشىسىنە سۇحبات بەرگەن اسىق اتۋدان استانالىق كوماندانىڭ باس باپكەرى ەسكەندىر راحمەتوۆ ۇلتتىق ويىندى كاسىبي تۇرعىدا دامىتۋ، سونىڭ ىشىندە حالىقارالىق دەڭگەيگە كوتەرۋ جايىندا كەڭىنەن ايتىپ بەردى.

- سۇحباتىمىزدى اسىق اتۋدى رەسپۋبليكا بويىنشا، سونىڭ ىشىندە استانادا دامىتۋ جۇمىستارىنان باستاساڭىز؟

 - بۇگىندە اسىق اتۋدىڭ ناقتى ەرەجەلەرى بار. ونى مادەنيەت جانە سپورت مينيسترلىگى مەن ۇلتتىق سپورت تۇرلەرى فەدەراتسياسى بەكىتكەن. قازاقستان چەمپيوناتى «بەس تابان» جانە «بەس تاس» ەرەجەسى بويىنشا ءوتىپ تۇرادى. 2015 -جىلى العاشقى چەمپيونات قوستاناي قالاسىندا ۇيىمداستىرىلعان بولاتىن. سول كەزدە جەرگىلىكتى سپورتشىلار ءبىرىنشى ورىندى يەلەندى. جامبىل وبلىسى - ەكىنشى، ال  قىزىلوردا وبلىسى ءۇشىنشى ورىنعا كوتەرىلگەن. استانا ءتورتىنشى ورىندى قاناعات تۇتتى. ال ورال قالاسىندا وتكەن بىلتىرعى چەمپيوناتتا استانا 16 كوماندانىڭ اراسىندا ەكىنشى ورىننان كورىنگەن ەدى. جامبىل وبلىسىنىڭ سپورتشىلارى جەڭىمپاز اتاندى.

مىنە، بيىل 8 جىل بولدى، استانادا «التىن ساقا» حالىقارالىق تۋرنيرى ۇيىمداستىرىلىپ كەلەدى. جىل سايىنعى جارىسقا قازاقستان، قىرعىزستان، تاجىكستان، وزبەكستان مەن رەسەي سپورتشىلارى قاتىسادى. رەسپۋبليكالىق جانە حالىقارالىق سايىستارعا تانىمال ارتىستەر مەن مۋزىكانتتارعا دا قاتىسۋعا مۇمكىندىك بەرىلەدى.

 وسىلايشا، ءبىز حالىقتىڭ اسىق اتۋعا دەگەن قىزىعۋشىلىعىن ارتتىرىپ، ونى كەڭىنەن ناسيحاتتاۋدى كوزدەيمىز. قازىرگى كەزدە استانادا اسىق اتۋدى ناسيحاتتاۋ بويىنشا ءبىراز شارالار اتقارىلىپ كەلەدى. ول ءۇشىن «جىگەر» اتتى سپورت كلۋبىندا ارنايى سەكسيا بار. ول جەردە ەكى باپكەر جۇمىس ىستەيدى. ال كلۋبتىڭ شاكىرتتەرى قۇربان ايت، استانا كۇنى، ناۋرىز سياقتى ۇلتتىق جانە مەملەكەتتىك مەيرامدار كەزىندە ءوز ونەرلەرىن پاش ەتىپ، حالىقتىڭ ورتاسىندا اسىق اتۋدىڭ شەبەرلىگىن كورسەتىپ جۇرەدى. وق بويى وزىق شىققاندار قالا چەمپيوناتىنا قاتىسادى. سونىڭ قورىتىندىسى بويىنشا ءبىز ءبىرىنشى جانە ەكىنشى رازريادتاعى «سپورت شەبەرىنە كانديدات» اتاعىن تاپسىرامىز. 1, 2, 3-ورىندارعا يە بولعان سپورتشىلار رەسپۋبليكالىق جارىستارعا جولداما الادى.

 - سوندا استانالىق كوماندانىڭ قۇرامىندا نەشە سپورتشى بار؟

- قازىرگى كەزدە كومانداعا 14 سپورتشى ىرىكتەلدى. جالپى، سپورت كلۋبىندا 30-عا جۋىق ادام جاتتىعىپ ءجۇر. ولاردىڭ ىشىندە نازىك جاندىلار دا از ەمەس. ايەلدەر «بەس تاس»، «بەس تابان»، «ءۇش تابان» جانە «توپاي» اتتى سايىستاردا جاقسى ناتيجە كورسەتىپ ءجۇر. نەگىزى، استانادا اسىق اتۋ ويىنى جاقسى دامىپ كەلەدى. ماسەلەن، بۇگىندە ءاربىر ۇجىمدا اسىق اتۋ مەن توعىزقۇمالاقتان جارىستار ۇيىمداستىرىلىپ وتىرادى. وسى سايىستاردا كوزگە تۇسكەندەردى دە ءبىز كومانداعا شاقىرىپ جاتامىز. بىرەۋلەر كەلەدى، ەندى بىرەۋلەر ۋاقىت تىعىزدىعىنا بايلانىستى كەلە الماي جۇرەدى. مەن ويلايمىن، ءبىز حالقىمىزدىڭ اسىق اتۋ سياقتى كونە داستۇرىنە قۇرمەت كورسەتۋمەن شەكتەلمەۋىمىز كەرەك. ونى ارى قاراي دامىتىپ، حالىقارالىق دارەجەدە كەڭىنەن ناسيحاتتاۋ قاجەت. ءيا، ءدال ءقازىر ورتالىق ازيادا اسىق اتۋدىڭ حاس شەبەرلەرى ول - قازاقستان مەن قىرعىزستان. ەندى، اتا- بابامىزدان قالعان وسى ءبىر ويىندى جان- جاقتى دامىتۋ قاجەت، سان الۋان جارىستاردى ءجيى وتكىزۋ كەرەك، ىرىكتەۋ شارالارىن ەش توقتاتپاعان ءجون.

- قازىرگى كەزدە سپورت كلۋبىندا شامامەن 30 ادام بار دەدىڭىز. ال وسىدان 10 جىل بۇرىن قالاي بولدى؟

- شىنى كەرەك، 10 جىل بۇرىن اتالعان سپورت ءتۇرىنىڭ جاعدايى ءماز ەمەس ەدى. ءبىزدىڭ الەۋمەتتىك جاعدايىمىز دا دۇرىس بولمادى. ال قازىرگى جاعداي كۇردەلى وزگەردى. استانالىقتار بوس ۋاقىتتا اسىق وينايدى. حالىق وسى ويىننىڭ پايدالى جاقتارىن دا جاقسى تۇسىنەدى. ويىن كەزىندە ادامنىڭ بارلىق دەنە مۇشەلەرى قوزعالادى، ال ەڭ باستىسى، كوزدىڭ كورۋ قابىلەتى جاتتىعادى. سەبەبى اسىقتى 5-6-7 مەتردەن دالدەۋ كەرەك. اسىق ويناۋدىڭ پايداسى قازىرگى اقپاراتتىق تەحنولوگيالار زامانىندا ارتىپ وتىر. ويتكەنى بالالار مەن جاستار ۋاقىتتىڭ باسىم بولىگىن سمارتفونعا شۇقشيىپ وتىرۋمەن وتكىزەدى. ۇلكەندەر دە ولاردان ەش قالىسپايدى. ال اسىق اتۋمەن اينالىساتىندار فيزيكالىق جاعىنان عانا ەمەس، پسيحولوگيالىق تۇرعىدا دا شىنىعادى. شىدامدىلىققا ۇيرەنەدى، ءبىر كوماندادا جۇمىس ىستەۋگە ماشىقتانادى. سوسىن اسىق ويناۋ ءۇشىن ارنايى ءبىر زالعا بارۋدىڭ قاجەتى جوق. قارا جەردە ويناي بەرۋگە بولادى. وعان جاسى دا، كارىسى دە قاتىسا الادى.

 - ۇلتتىق سپورت تۇرلەرىن دامىتۋ جايىندا ايتقاندا قازاق كۇرەسىنىڭ تابىستى جولى ەسكە تۇسەدى. بۇگىندە «قازاقستان بارىسى» رەسپۋبليكالىق جارىستان قۇرلىقتىق، ءتىپتى الەمدىك دەڭگەيگە دەيىن كوتەرىلدى. اسىق اتۋ دا وسىنداي جەتىستىككە جەتەدى دەپ ايتۋعا بولا ما؟

 - سپورتتىڭ بۇل ءتۇرى دامىپ كەلەدى. بىرىنشىدەن، اسىق اتۋدى رەسپۋبليكا بويىنشا ءاربىر قالادا، ءاربىر وبلىستا وينايتىنداي كەڭىنەن ناسيحاتتاۋعا ارنالعان ۇلكەن جۇمىستار اتقارىلدى. قازىرگى كەزدە ءبىز ورتالىق ازيا ەلدەرى اراسىنداعى سايىستارعا قاتىسىپ تۇرامىز. اسىق اتۋدى گەرمانيا مەن گونكونگتە تۇراتىن قازاقتار اراسىندا ناسيحاتتاپ كەلەمىز. الداعى ەكسپو-2017 كورمەسى كەزىندە ءبىز اسىق اتۋدىڭ پايداسىن جان- جاقتى تانىستىرىپ، شەتەلدىك تۋريستەرگە كورسەتۋدى كوزدەيمىز.

 - ءدال قازىر قازاقستاندا اسىق اتۋمەن كاسىبي تۇردە قانشا ادام اينالىسادى ەكەن؟

 - رەسمي مالىمەتكە سايكەس، وتكەن جىلى اسىق اتۋمەن اينالىسقان ادامداردىڭ سانى 80 مىڭ بولعان. ول از ەمەس. سولاردىڭ ىشىنەن 8-اق ادام ۇلتتىق قۇرامانىڭ ساپىنا ىرىكتەلىپ، ەل نامىسىن حالىقارالىق دارەجەدە قورعاۋعا مۇمكىندىك الدى. بىلۋىمشە، ونداي باسەكەلەستىك تەك بىزدە، سوسىن قىرعىز جەرىندە عانا بار.

 - اڭگىمەڭىزگە راقمەت!

ۇلتتىق ويىنىمىزدىڭ دارەجەسى وسە بەرسىن!

اۆتور: ارمان اسقاروۆ