حەوپس پەرعاۋىننىڭ وزىمەن بىرگە جەرلەنگەن قايىعى جەر بەتىنە شىعارىلدى

استانا. قازاقپارات -  مىسىردا حەوپس پەرعاۋىننىڭ وزىمەن بىرگە جەرلەنگەن قايىعىنىڭ ەڭ ۇلكەن بولىگى جەر بەتىنە شىعارىلدى. ول گيزا پيراميدالارىنىڭ جانىنداعى قازبا جۇمىستارى كەزىندە تابىلعان.

اعاش تاقتايدىڭ ۇزىندىعى - 26 مەتر. نەگىزى قايىقتىڭ العاشقى بولىگى 1980 -جىلى تابىلعان بولاتىن. وسى كۇنگە دەيىن ماماندار ونىڭ 700-گە تارتا سىنىعىن الىپ شىققان.

بارلىعى قازبا جۇمىستارىنىڭ جانىندا ارنايى سالىنعان زەرتحانادا ساقتالادى. مۇندا قالپىنا كەلتىرۋ شارالارى جۇرگىزىلىپ جاتىر. ولار اياقتالعاننان كەيىن قايىق ۇلكەن مىسىر مۇراجايىنا تاپسىرىلۋى ءتيىس. مۋزەيدىڭ اشىلۋى كەلەسى جىلعا جوسپارلانىپ وتىر. ايتا كەتكەن ءجون، سۋ كولىگى ەجەلگى مىسىرلىقتار اراسىندا تەك قاتىناۋ ءۇشىن عانا ەمەس، كوڭىل كوتەرىپ، ءدىني راسىمدەر وتكىزۋ ءۇشىن دە قولدانىلعان. پەرعاۋىنداردىڭ كوبى قايىقتارىمەن بىرگە جەرلەنەتىن. سەنىم بويىنشا سۋ كولىگى ولاردى و دۇنيەگە جەتكىزۋى ءتيىس.

ماحمۇد تاحا، ارحەولوگ:

 - بۇل - قازبا جۇمىستارىنىڭ جانىنان اشىلعان زەرتحانا. ءبىز مۇندا حەوپس پەرعاۋىننىڭ قايىعىن قالپىنا كەلتىرۋ جۇمىستارىن جۇرگىزىپ جاتىرمىز. ول ءۇشىن جوعارى تەحنولوگيالىق قۇرالدار جانە ارنايى اپپاراتتاردى قولدانامىز.

www.24.kz