ەۋروكوميسسيا باسشىسى دونالد ترامپقا قاتاڭ ەسكەرتۋ جاسادى

استانا. قازاقپارات -  ا ق ش پرەزيدەنتى دونالد ترامپ ەۋروپا تۇرعىندارىن ەۋروداق ايماعىنان شىعۋعا ۇگىتتەۋىن توقتاتۋى كەرەك. مۇنداي مالىمدەمەنى ەۋروكوميسسيا باسشىسى جان- كلود يۋنكەر مالتاداعى ەۋروپالىق حالىقتىق پارتياسى كونگرەسىندە جاسادى.

 ونىڭ پىكىرىنشە، اق ءۇي باسشىسى كارى قۇرلىق ەلدەرىن  ۇلى بريتانيا سياقتى وداقتان شىعۋعا شاقىرعان. ەگەر ترامپ وسىنداي ارەكەتىن توقتاتپاسا، ەۋروكوميسسيا باسشىسى ۆاشينگتوننان تەحاس جانە وگايو شتاتىنا تاۋەلسىزدىكتى بەرۋدى تالاپ ەتەتىنىن جەتكىزدى.

 ايتا كەتەيىك، بۇعان دەيىن اق ءۇيدىڭ باسپا ءسوز حاتشىسى شون سپايسەر دونالد ترامپتىڭ «برەكسيتتى» بەلسەندى جاقتاۋشىلاردىڭ ءبىرى بولعانىن ايتقان بولاتىن.

جان- كلود يۋنكەر، ەۋروكوميسسيا ءتوراعاسى:

- جۋىردا سايلانعان ا ق ش پرەزيدەنتى بريتاندىقتاردىڭ ەۋرووداق قۇرامىنان شىعاتىنىنا قۋانىپ جاتىر. ول وزگە ەلدەردى دە وسىنداي قادامعا بارۋعا شاقىردى. وسىلاي جالعاسا بەرەتىن بولسا، مەن دە وگايو مەن تەحاس شتاتىنىڭ ا ق ش قۇرامىنان شىعۋىن تالاپ ەتپەكپىن.

www.24.kz