ساپاربايەۆ تەولوگتارعا: ساعاتتاپ تەرميندەرگە تولى ءدارىس وقىماۋدى سۇرايمىن

اقتوبە. قازاقپارات - اقتوبە وبلىسىنىڭ اكىمدىگى وتكەن جىلى باس پروكۋراتۋرا باستاپ بەرگەن «حالىق قاۋىپسىزدىگىن قامتاماسىز ەتۋ» جوباسىن جالعاستىرادى. تەولوگتار جات اعىم جەتەگىندە جۇرگەندەرگە ءداستۇرلى ءدىندى تۇسىندىرەتىن بولادى،

 دەپ حابارلايدى قازاقپارات ءتىلشىسى.

 اقتوبە وبلىسىنىڭ مۇعالجار، تەمىر، العا، بايعانين، شالقار اۋداندارىندا جات اعىم جەتەگىندە جۇرگەندەر، اداسقاندار قاتارى وزگە اۋداندارعا قاراعاندا كوپ. 3- ءساۋىر كۇنى «حالىق قاۋىپسىزدىگىن قامتاماسىز ەتۋ» جوباسى اياسىندا وسى اۋدان تۇرعىندارىمەن كەزدەسۋ جۇمىستارى باستالادى. كەزدەسۋدى بىلىكتى ماماندار، تەولوگتار جۇرگىزەدى. وبلىس اكىمى بەردىبەك ساپاربايەۆ مامانداردان قاراپايىم تىلمەن سويلەپ، تەرمين سوزدەردى قولدانباۋدى تاپسىرما بەردى.

 «كەزدەسۋ كەزىندە، تۇسىندىرمە جۇمىستارىن جۇرگىزگەندە قاراپايىم حالىقتىڭ تىلىندە سويلەۋلەرىڭىزدى سۇرايمىن. ساعات بويى ارنايى تەرمين سوزدەرگە تولى لەكسيالار وقۋدىڭ قاجەتى جوق. سول ءۇشىن ءار كەزدەسۋگە الدىن- الا دايىندالۋ كەرەك. ەڭ باستىسى - مۇنىڭ ءبارى حالىققا پايداسىن تيگىزىپ، جوباعا قاتىسقان ءار تۇرعىن وڭ تيىمدىلىگىن سەزىنۋى ءتيىس. ناتيجەگە قول جەتكىزۋدى ماقسات ەتىڭىز»، - دەدى وبلىس اكىمى بەردىبەك ساپاربايەۆ.

جۇمىس توبى سونداي- اق الەۋمەتتىك ماسەلەلەردى شەشۋ، ءدىني ەكسترەميزمنىڭ الدىن- الۋ، مەملەكەتتىك جانە سالالىق باعدارلامالاردىڭ جۇزەگە اسىرىلۋىن تۇسىندىرەدى. وڭىرىندەگى بيزنەس ورتانى دامىتۋعا كۇش سالادى. ەسكە سالساق، 5- ماۋسىمداعى لاڭكەستىك وقيعادان سوڭ ەلباسى تاپسىرماسىمەن باس پروكۋراتۋرا «حالىق قاۋىپسىزدىگىن قامتاماسىز ەتۋ» جوباسىمەن اقتوبەگە كەلدى. ولار ءبىر اي بويى اۋدان، اۋىلدى ارالاپ، تۇرمەدە جازاسىن وتەپ وتىرعاندارمەن دە كەزدەسۋ وتكىزدى.