مينيستر مۇحامەدي ۇلى فونوگرامماعا قالاي تىيىم سالاتىنىن ايتتى
بۇل تۋرالى بۇگىن سەناتتا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى، دەپ حابارلايدى قازاقپارات.
«بارشا الەمدە «نەگە فونوگراممامەن ءان ايتادى» دەگەن ماسەلە تالقىلانۋدا. دۇنيەجۇزىندە ناقتى قالىپتاسقان جۇيە بار، اسىرەسە ەۋروپا ەلدەرىندە، ا ق ش- تا، قازىرگى ۋاقىتتا وزبەكستان مەن تۇركىمەنستاندا دا بۇل جۇيە ەسكەرىلگەن. ياعني ءاربىر كونسەرت ۇيىمداستىرۋشىعا مينيسترلىك ليتسەنزيا بەرۋى كەرەك. وكىنىشكە قاراي، ءبىزدىڭ زاڭنامادا بۇل قادامدار جوق. 2006-جىلى جالپىلاما زاڭدى قابىلدادىق، ءبىراق ناقتى ءار باعىتتا كەيبىر كەمشىلىكتەر بار. قازىرگى ۋاقىتتا كونسەرت ۇيىمداستىرۋشىلار ليتسەنزياعا كوشپەيىنشە، بۇل ماسەلە شەشىلمەيتىنى انىق»، - دەپ توقتالدى مينيستر.
وسى ورايدا ول كەز كەلگەن ادام كونسەرتتى ۇيىمداستىرىپ، ساحناعا شىعا الاتىنىن اتاپ ءوتتى. «ال ەگەر ليسەنزيا بەرسەك، «اينالايىندار، سىزدەر فونوگراممامەن زاڭدى بۇزدىڭىزدار، سوندىقتان ليتسەنزياڭىز جويىلادى» دەپ ناقتى ايتا الار ەدىك»، - دەدى مۇحامەدي ۇلى.
ونىڭ ايتۋىنشا، بۇل باعىتتاعى قادامداردى رەتتەگەننەن كەيىن، كونسەرتتەردە فونوگراممامەن ءان ايتقىزباۋ ماسەلەسىن تولىق شەشۋگە بولادى.
اۆتور: رۋسلان عابباسوۆ
