09:19, 31 - ناۋرىز 2017 | GMT +5
حاكەرلەر فرانسيا پرەزيدەنتىنىڭ فەيزبۋك اككاۋنتىن بۇزدى
استانا. قازاقپارات - حاكەرلەر فرانسيا پرەزيدەنتى فرانسۋا وللاندتىڭ Facebook-تەگى اككاۋنتىن بۇزىپ، ونىڭ پاراقشاسىنا 7 مامىرعا بەلگىلەنگەن «فرانسۋا وللاندتىڭ وتستاۆكاعا كەتۋىنىڭ قۇرمەتىنە ۇيىمداستىرىلعان كەش» اتتى ءىس-شاراعا شاقىرۋ جاريالاعان، دەپ حابارلايدى قازاقپارات ر ب ك- عا سىلتەمە جاساپ.
شاقىرۋ وللاندتىڭ رەسمي پاراقشاسىندا ءبىر ساعات بويى تۇردى، كەيىننەن الىنىپ تاستالدى. ءىس-شارانى نەگىزىنەن «فرانسۋا وللاندتىڭ وتستاۆكاسى ءۇشىن» قوزعالىسىنىڭ بەلسەندىلەرى ۇيىمداستىرىپ وتىر.
ءبىراق اتالمىش قوزعالىستىڭ Facebook-تەگى وكىلدەرى پرەزيدەنت اككاۋنتىنىڭ بۇزىلۋىنا قاتىسى جوقتىعىن مالىمدەدى. الەۋمەتتىك جەلىدەگى 12 مىڭ قولدانۋشى كەزدەسۋگە باراتىندىعىن بەلگىلەگەن. الايدا، «فرانسۋا وللاندتىڭ وتستاۆكاسى ءۇشىن» قوزعالىسىنىڭ Facebook-تەگى پاراقشاسىندا پرەزيدەنتتىڭ اتالمىش كەشكە شاقىرعان جازباسىنىڭ سكرينشوتى كەلتىرىلگەن.
«ەندى ءبىز رەسمي تۇردە فرانسۋا وللاندتىڭ قولداۋىنا يە بولدىق (ەش قالجىڭسىز)»، - دەلىنگەن قوزعالىستىڭ حابارلاماسىندا.
