سۇلەيمەنوۆ ەكسپو قازاقستاننىڭ باعا ساياساتىنا قالاي اسەر ەتەتىن ايتتى
«شىنىمدى ايتسام، ەكسپو كورمەسى قازاقستانداعى باعا نارىعىنا قاتتى اسەر ەتەدى دەپ ويلامايمىن. تەك قوناق ۇيلەر مەن مەيرامحانا، تۋريستىك نىساندارداعى باعا كوتەرىلۋى مۇمكىن. الايدا، ەكسپو كەزىندە دۇكەندەردەگى ازىق-تۇلىك باعاسى قاتتى ارتادى دەپ ويلامايمىن. ويتكەنى، تۋريستەردىڭ كوبى دۇكەن ەمەس، كوڭىل كوتەرۋ ورىندارىن، مەيرامحانالاردى، تۋريستىك نىسانداردى كوپ ارالايدى عوي»، - دەپ جاۋاپ بەردى مينيستر.
ءمينيستردىڭ ايتۋىنشا، ەكسپو كورمەسى، كەرىسىنشە، جەمىس-جيدەكتىڭ باعاسى ارزاندايتىن ماۋسىمدا وتەدى. «ياعني، وڭتۇستىك وڭىرلەردە جەمىس-جيدەك ءپىسىپ، ورتالىققا، سولتۇستىك وڭىرلەرگە كوپتەپ ساتىلعان سوڭ، باعا ارزاندايدى. سوندىقتان، تۋريستەردىڭ ارقاسىندا شاعىن جانە ورتا بيزنەس، ياعني، قوناق ۇيلەر مەن مەيرامحانالار تابىس تابادى»، - دەيدى سۇلەيمەنوۆ.
ايتا كەتەيىك، ەكسپو حالىقارالىق كورمەسى 10- ماۋسىمدا باستالىپ، 10- قىركۇيەك كۇنى جابىلادى.
اۆتور: كەنجەكەي توقتامۇرات قىزى
