قازاقستاندا جەر قويناۋىن يگەرىپ جاتقان ينۆەستورلارعا سالىق جاعىنان جەڭىلدىكتەر بەرىلەدى
ءمينيستردىڭ ايتۋىنشا، كودەكسكە ەنگىزىلگەن وزگەرىستەردىڭ ءبىراز بولىگى جەر قويناۋىن يگەرۋ جۇمىستارىنا ارنالعان.
«وسىنىڭ ارقاسىندا قوسىمشا تەرريتوريالارعا گەولوگيالىق بارلاۋ جاساۋعا مۇمكىندىك تۋادى. ءبىز كوممەرتسيالىق بونۋستى الىپ تاستاۋدى جوسپارلاپ وتىرمىز. ينۆەستورلار ونى «تابىس ءۇشىن بونۋس» دەپ اتايدى. سەبەبى قانداي دا ءبىر رەسۋرستار تابىلعاندا ول ءۇشىن سومانىڭ ءبىراز بولىگىن تولەۋگە تۋرا كەلەدى. بۇدان بولەك، «قول قويۋ بونۋسىن» تومەندەتۋدى كوزدەيمىز. اتالعان سالىقتى كەلىسىمشارتقا قول قويعاندا تولەيدى»، - دەيدى سۇلەيمەنوۆ.
سونداي-اق وتاندىق مۇناي-گاز سالاسىنا ينۆەستورلاردى كوپتەپ تارتۋ ماقساتىندا بارلاۋ مەن ءوندىرۋ كەزىندەگى سالىقتاردى الىپ تاستاۋ ماسەلەسى قارالىپ جاتىر. ونىڭ ورنىنا ناقتى كوممەرتسيالىق تابىس سالىعىن ەنگىزۋ تۋرالى ۇسىنىس بار. وندايدا جەر قويناۋىن يگەرىپ جاتقان ينۆەستور ناقتى تابىسقا يە بولعاندا عانا سالىقتىڭ ءتيىستى مولشەرىن تولەيدى.
ايتا كەتەيىك، باسپا ءسوز ءماسليحاتىندا مينيستر ەكى كۇننەن كەيىن كاسىپكەرلىكتى جاپپاي دامىتۋ باعدارلاماسى اياسىندا نەسيە بەرۋ شارالارىنىڭ باستالاتىنىن مالىمدەدى. سونداي-اق قازىرگى ەكونوميكالىق وسىممەن دامىعان 30 مەملەكەتتىڭ قاتارىنا كىرۋ قيىن بولاتىنىن جەتكىزدى.
اۆتور: ارمان اسقاروۆ