ساعىنتايەۆ: سەرۆيستىك ەكونوميكانى دامىتۋ قاجەت

اقتوبە. قازاقپارات - ۇكىمەت باسشىسى باقىتجان ساعىنتايەۆ ەكونوميكانى تەحنولوگيالىق جاڭعىرتۋ كەزىندە سەرۆيستىك ەكونوميكانى دامىتۋدى تاپسىردى.

 

سول كەزدە جۇمىسسىز قالعان ادامدار قايدا باراتىنىن ءبىلىپ وتىرادى. بۇل تۋرالى پرەمەر-مينيستر اقتوبەدەگى كاسىپورىن باسشىلارىمەن كەزدەسۋىندە ايتتى، دەپ حابارلايدى قازاقپارات ءتىلشىسى.

اقتوبەدە ەكونوميكانى تەحنولوگيالىق جاڭعىرتۋ باعىتىنداعى جۇمىس باستالىپ كەتتى. بارلىعى 10 جوبا ىسكە اسىرىلادى. ولاردىڭ التاۋى - توقتاپ تۇرعان كاسىپورىن. الدىن-الا بەلگىلى بولعانى، ەكونوميكانى جاڭعىرتۋ كەزىندە 3 مىڭ ادام جۇمىسسىز قالادى. جۇمىس ورنىنان ايىرىلعانداردىڭ 70 پايىزى بۇرىنعى كاسىپورىندا ەڭبەگىن جالعاستىرادى. بۇل جۇمىس پرەمەر-مينيستر باقىتجان ساعىنتايەۆ ءۇشىن تىڭ ۇسىنىس بولمادى. ۇكىمەت باسشىسى سەرۆيستىك ەكونوميكانى دامىتۋدى تاپسىردى.

«كاسىپورىندى جاڭعىرتۋ كەزىندە قىسقارعان جۇمىسشىلاردىڭ باسىم بولىگى سول زاۋىتتا قالادى ەكەن. بەردىبەك ماشبەك ۇلى (اقتوبە وبلىسىنىڭ اكىمى ب. ساپاربايەۆ - رەد.)، بۇل جەردە سىزبەن كەلىسپەيمىن. ادامدار تاعى سول زاۋىتتىڭ اينالاسىندا ءجۇرىپ، ەڭبەك ەتە بەرسە، اۆتوماتتاندىرىلعان جۇيەنى ەنگىزگەن كەزدە بۇل ءتيىمسىز بولادى. سوندىقتان ءبىز سەرۆيستىك ەكونوميكانى دامىتۋىمىز قاجەت. قىزمەت ورنىنان ايىرىلعان ادام سول جەرگە بارىپ، جاڭا جۇمىس ورنىنا ورنالاسۋ جولىن ءبىلۋى كەرەك. ول ءۇشىن ۇكىمەت، «اتامەكەن» ۇ ك پ، اكىمدىك بيزنەسكە بار جاعدايدى جاساۋى كەرەك»، - دەدى ۇكىمەت باسشىسى باقىتجان ساعىنتايەۆ.

جيىن كەزىندە الەۋمەتتىك جاڭعىرتۋ باعىتىندا شەشىمىن تاپپاي تۇرعان ماسەلەلەردىڭ دە بار ەكەنى ايتىلدى.

ەل زاڭناماسى بويىنشا مەديتسينالىق ورتالىق اشۋ ءۇشىن باس دارىگەر، باس دارىگەردىڭ ورىنباسارىنا 150 شارشى مەترلىك كابينەت قاجەت ەكەن.

«ءبىز 150 شارشى مەتر اۋماققا ەمحانا سالعىمىز كەلەدى، ال سىزدەر بىزدەن تەك باس دارىگەردىڭ بولمەسى ءۇشىن 150 شارشى مەتر تالاپ ەتەسىزدەر. مەندە ونداي اقشا جوق» دەدى ءبىر كاسىپكەر مەديتسينا سالاسى قاۋىمداستىعىنىڭ جيىنىندا.

ال ءدارىحانا اۋماعى 40 شارشى مەتردەن كەم بولماۋى ءتيىس. مىنە، وسىنداي قاراما-قايشىلىقتار بار. ءبىز جاساندى كەدەرگىلەردى جويۋىمىز قاجەت. سوندا ەكونوميكا داميدى، جاڭا جۇمىس ورىندارى اشىلادى»، - دەدى ب. ساعىنتايەۆ.

ەكونوميكانى جاڭعىرتۋدا بىلىكتى كادردىڭ الار ورنى ەرەكشە. اقتوبە رەلس-ارقالىق زاۋىتىن مىسالعا كەلتىرگەن پرەمەر-مينيستر ستانوكتى ەۋروپادا وقىعان، جوعارى ءبىلىمدى ماماننىڭ باسقارىپ تۇرعانىن ايتتى.

ياعني، جاڭعىرتۋ جولىندا قۇرىلعىنى باسقارۋ وڭاي ەمەس، وعان ارنايى ءبىلىم الىپ، تاجىريبە جيناۋ قاجەت. «ەكونوميكانى جاڭعىرتۋ باعدارلاماسىن ىسكە اسىرۋ كەزىندە قاجەتتى مامانداردى الدىن-الا دايىنداۋ كەرەك. بۇگىن وقىتىلادى. ەرتەڭ ول مامان قاجەت بولماي قالۋى مۇمكىن. بۇل سۇراقتى كاسىپورىندارمەن بىرلەسە شەشۋگە بولادى. ولار ەرتەڭگى كۇندى ءبىلىپ وتىرادى. سول كەزدە 2-3 جىل وقىتپاي، ماماننىڭ قوسىمشا ءبىلىمدى از ۋاقىتتا الۋىنا مۇمكىندىك جاساۋىمىز كەرەك»، - دەدى ب. ساعىنتايەۆ.