قۇل- مۇحاممەد مينيسترلىكتەردە قانداي ادامدار جۇمىس ىستەۋى كەرەكتىگىن ايتتى
دەپ حابارلايدى قازاقپارات.
«بيىل ەلباسىنىڭ باستاماسىمەن كونستيتۋتسياعا تاريحي وزگەرىستەر ەنگىزىلدى. ول مەملەكەتتىك باسقارۋدىڭ جاڭا ۇلگىسىن قالىپتاستىردى. اتقارۋشى بيلىكتىڭ وكىلەتتىگى ايتارلىقتاي ۇلعايدى، بارلىق دەڭگەيدەگى مەملەكەتتىك قىزمەتكەرلەردىڭ جاۋاپكەرشىلىگى كۇشەيدى. سوندىقتان ساپالى جاڭا اپپاراتتى قالىپتاستىرۋ جونىندەگى مەملەكەت باسشىسى العا قويىپ وتىرعان تاپسىرمالار مۇلتىكسىز ورىندالۋى ءتيىس. بىزگە زاڭدىلىقتى قاتاڭ ساقتايتىن، كاسىبي جاعىنان بىلىكتى جانە جاۋاپكەرشىلىگى زور مەملەكەتتىك قىزمەتكەرلەر قاجەت»، - دەپ توقتالدى م. قۇل- مۇحاممەد مەملەكەتتىك قىزمەتتى رەفورمالاۋ ماسەلەلەرى جونىندەگى پارتيالىق تىڭداۋلار بارىسىندا.
وسى ورايدا ول قازاقستاندا پوستكەڭەستىك رەسپۋبليكالار ىشىندە ءبىرىنشى بولىپ 2006 -جىلى مەملەكەتتىك قىزمەت جونىندەگى اگەنتتىك قۇرىلعانىن، سونداي- اق ەلىمىز مەملەكەتتىك قىزمەت تۋرالى زاڭنامانى قابىلداعانىن ەسكە سالدى.
«سوندىقتان قازاقستانداعى «مەملەكەتتىك قىزمەت تۋرالى» زاڭ دا، اگەنتتىك تە، جالپى قىزمەتشىلەردىڭ جۇمىسى دا حالىقارالىق بيىك تالاپتارعا ساي بولۋى كەرەك دەپ ەسەپتەيمىز. ويتكەنى ءاربىر مەملەكەتتىك قىزمەتكەردىڭ ەڭ باستى مىندەتى - حالىققا قىزمەت ەتىپ، ءوزىنىڭ بەرگەن سەرتىنە ادال بولۋ»، - دەدى قۇل- مۇحاممەد.
مۇنىمەن قوسا، «نۇر وتان» پارتياسى ءتوراعاسىنىڭ ءبىرىنشى ورىنباسارى مەملەكەتتىك قىزمەت تۋرالى جاڭا زاڭناما قابىلدانعاننان بەرى بايقالعان وزگەرىستەرگە توقتالدى.
«مەملەكەتتىك قىزمەت تۋرالى جاڭا زاڭ قابىلدانعالى ءبىر جىلعا جۋىق ۋاقىت ءوتىپ، وسى رەتتە وڭتايلى ءۇردىس بايقالىپ وتىر. بۇل زاڭناما قالاي جۇمىس ىستەپ جاتقاندىعى تۇرعىسىندا ءتيىستى قورىتىندى جاساۋعا بولادى. ول قابىلدانعاننان كەيىن 6 مىڭنان استام مەملەكەتتىك قىزمەتكەر مانساپ بويىنشا جوعارىلادى»، - دەدى ول.
اۆتور: رۋسلان عابباسوۆ 
