ساپاربايەۆ ۇكىمەت باسشىسىنا وڭىردە اتقارىلىپ جاتقان ىستەردى باياندادى

اقتوبە. قازاقپارات - اقتوبەگە ەكى كۇندىك جۇمىس ساپارىمەن كەلگەن ۇكىمەت باسشىسى باقىتجان ساعىنتايەۆ كاسىپكەرلەرمەن كەزدەسۋ وتكىزىپ جاتىر. جيىنعا وڭىردەگى ءىرى ءوندىرىس ورىندارىنىڭ باسشىلارى مەن ينۆەستورلار قاتىسۋدا،

 دەپ حابارلايدى قازاقپارات ءتىلشىسى.

بۇگىن «نۇرلى جەر» باعدارلاماسى بويىنشا سالىنىپ جاتقان تۇرعىن ۇيلەردىڭ قۇرىلىسىمەن تانىسقان ۇكىمەت باسشىسى باقىتجان ساعىنتايەۆ كاسىپكەرلەرمەن كەزدەسۋدە ءوڭىر ەكونوميكاسىنىڭ دامۋىن تىڭدادى.

«ءبىز «قازحروم» ت ۇ ك» ا ق- نىڭ اقتوبە فەرروقورىتپا زاۋىتىندا بولدىق. مۇندا مەن بىردە- ءبىر جۇمىسشىنى كورمەدىم. ءبىر اۋىسىمدا بار بولعانى 50 ادام جۇمىس ىستەيدى ەكەن. ءوندىرىستىڭ جاڭارۋى دەگەن وسى. زاۋىت زاماناۋي تەحنولوگيامەن سالىنعان. ەل ەكونوميكاسىنىڭ دامۋى دا جاڭارۋعا بايلانىستى»، - دەدى ب. ساعىنتايەۆ.

جيىن كەزىندە وبلىس اكىمى بەردىبەك ساپاربايەۆ اقتوبەنىڭ ەكونوميكالىق، اۋىل شارۋاشىلىعى، الەۋمەتتىك دامۋى تۋرالى جان- جاقتى اقپارات بەردى.

 «جىلدىڭ باستاۋى جامان ەمەس. نەگىزگى الەۋمەتتىك- ەكونوميكالىق كورسەتكىش وتكەن جىلدىڭ سايكەس كەزەڭىمەن سالىستىرعاندا ءۇش پايىزعا ءوستى. ەكونوميكانى تەحنولوگيالىق جاڭارتۋ جولىندا ءبىرقاتار جۇمىستار قولعا الىندى. جوسپار بويىنشا وڭىردە 10 كاسىپورىن جاڭارتىلادى. ونىڭ التاۋى جۇمىسىن توقتاتقان ءوندىرىس ورنى. سولاردى ىسكە قوسامىز. بارلىعى 390 ميلليارد تەڭگە ينۆەستيتسيا تارتىلادى. ەسەپ بويىنشا، ءوندىرىستى جاڭارتۋعا الداعى بەس جىلدا 40 ميلليارد تەڭگە جۇمسالادى. جاڭارتۋ جۇمىستارى كەزىندە 3 مىڭ ادام جۇمىستان بوساتىلادى. كاسىپورىندار ولاردىڭ 70 پايىزىنا باسقا جۇمىس ۇسىنادى. ال وزگەسى قايتا وقىتىلادى»، - دەدى وبلىس اكىمى بەردىبەك ساپاربايەۆ.

 جيىن كەزىندە وڭىردەگى اۋىل شارۋاشىلىعى سالاسىنىڭ دامۋى دا ءسوز بولدى. جوسپار بويىنشا وڭدەۋ سالاسىن جىل سايىن 7-8 پايىزعا ءوسىرۋ كەزدەلگەن. وڭىردە 129 اۋىل شارۋاشىلىعى كووپەراتيۆى بار. «نۇرلى جەر» باعدارلاماسى اياسىندا 480 تۇرعىن ءۇيدىڭ قۇرىلىسى بيىل اياقتالىپ، قىركۇيەكتە قولدانىسقا بەرىلەدى. قۇرىلىس كەزىندە قاجەتتى ماتەريالداردىڭ 80 پايىزى جەرگىلىكتى جەردەن الىنادى. بۇل ۇيلەردىڭ باعاسى قولجەتىمدى. ءار شارشى مەترى 120 مىڭ تەڭگەدەن اسپايدى. الداعى جوسپار بويىنشا باعدارلاما اياسىندا اۋماعى 1,2 ميلليون شارشى مەتر بولاتىن 100 مىڭ تۇرعىنعا ارنالعان جاڭا اۋدان بوي كوتەرەدى»، - دەدى وبلىس اكىمى بەردىبەك ساپاربايەۆ.

اۆتور: التىناي ساعىندىقوۆا