شۆەد ازاماتى جەلماياعا ءمىنىپ قازاق دالاسىن ارالاپ ءجۇر

 استانا. قازاقپارات - قازاقستاندى تۇيەمەن ءجۇرىپ ءوتۋدى ماقسات ەتكەن كريستيان بودەگرەن ەسىمدى شۆەتسيالىق ازامات قىزىلوردا وبلىسى وڭىرىنە تابان تىرەپتى.

بۇل تۋرالى qazaly.kz حابارلايدى.

ەلىمىزگە وتكەن جىلى قازان ايىنىڭ باسىندا كەلگەن ونىڭ نەگىزگى ماقساتى - كاسپي تەڭىزىنە جەتىپ، استانا قالاسىندا وتەتىن «ەكسپو-2017» كورمەسىنە قاتىسۋ ەكەن.

ال ۇزاق ءارى اۋىر ساپارعا ءتوزىمدى تۇيەنى شىعىس قازاقستان وبلىسىنان ساتىپ الىپتى. سكانديناۆيالىق جيھانكەزگە قازاقستاننىڭ تابيعاتى، ادامدارى جانە تاماقتارى قاتتى ۇناعان. ساپار بارىسىندا قىمىز، شۇباتتان ءدام تاتقان. ۇلتتىق تاعامىمىز دا كوڭىلىنەن شىعىپتى.

«ۇلى جىبەك جولىندا ورنالاسقان قازاقستاننىڭ تابيعاتى مەن ادامدارى قاتتى ۇنادى. قازاق دالاسىنىڭ تاپ- تازا اۋاسى، ءموپ- ءمولدىر وزەن- كولدەرىنىڭ سۇلۋلىعىنا تامساندىم. كاسپي تەڭىزىنە جەتكەن سوڭ تۇيەمدى ساتىپ، استانا قالاسىندا وتەتىن ەكسپو كورمەسىن تاماشالايمىن. كورمەگە كەلگەن تۋريستەرگە وسىندا تۇسىرىلگەن روليكتەردى كورسەتەمىن، - دەيدى كريستيان بودەگرەن.

ءبىر قىزىعى، كريستيان بۇل ساپارعا تۇيەمەن شىقسا دا، ويسىل قارا تۇقىمىنا قاجەتتى دۇنيەلەرىن عانا ارتىپ، ءوزى جاياۋ ءجۇرىپ كەلەدى. سەگىز ايعا جوسپارلانعان ساياحاتتى ۋاقىتىندا اياقتاۋ ءۇشىن جيھانكەز تۇندە تاماقتانىپ، ۇيىقتاپ، كۇندىز توقتاماستان ءجۇرىپ وتىرادى.

بۇدان بۇرىن ساياحاتشى ءتورت اي ىشىندە موڭعوليانى تۇيەمەن ءجۇرىپ ءوتىپ، سول ەلدىڭ تابيعاتىن تاماشالاعان.

 

جەڭىسبەك ايىمقۇلوۆ