لوندون ەۋرو وداقتان شىعاتىنىن رەسمي راستادى
بريتانيانىڭ ەۋرووداقتاعى تۇراقتى وكىلى تيم بارروۋ ەۋروكەڭەس ءتوراعاسى دونالد تۋسككە وسىنى ايقىندايتىن حات تاپسىردى. ىلە شالا دونالد تۋسك تىلشىلەرگە بۇل كۇندى رەسمي لوندون ءۇشىن دە بريۋسسەل ءۇشىن دە باقىتتى ءسات دەپ سانامايتىنىن ايتتى.
ليسسابون كەلىسىمىنىڭ 50- بابى بويىنشا بولىنەتىنىن رەسمي جاريالاعان ۇلى بريتانيا تۋرا ەكى جىلدا، ياعني 2019 -جىلدىڭ 29 - ناۋرىزىندا ەۋرووداق قۇرامىنان شىعۋى ءتيىس، دەپ جازادى «حابار 24».
«ۇلى بريتانيانىڭ ەۋرووداقتان شىعاتىنى تۋرالى رەسمي ءوتىنىش ءتۇستى. ەندى ليسسابون كەلىسىمىنىڭ 50- بابى بويىنشا كورولدىك باسشىلىعىمەن كەلىسسوزدەر باستالادى. بۇل قۋانارلىق جاعداي ەمەس. ءبىراق برەكسيتتىڭ جاقسى جاقتارى دا بار. وسى ارقىلى وداقتاعى 27 مەملەكەتتىڭ بىرلىگى بۇرىنعىسىنان دا بەكي تۇسەدى. ەندىگى ماقسات ازاماتتارىمىز بەن كاسىپكەرلەرىمىزدى شىعىنعا باتىرماي، ءتيىمدى بايلام جاساۋ»، - دەيدى ەۋرو كەڭەس ءتوراعاسى دونالد تۋسك.
