قازاقستان زاڭسىز تەمەكى اينالىمىنان قانشا ميلليارد تەڭگە جوعالتاتىنى بەلگىلى بولدى
مۇنداي ەسەپتى «كيپر» ساراپتاماشىلار توبىنىڭ جەتەكشىسى ەرلان سمايىلوۆ ايتتى، دەپ حابارلايدى قازاقپارات ءتىلشىسى.
«مەن زاڭدى نارىقتاعى مەملەكەت كىرىسىنە كىرمەگەن 1 پايىزدى ەسەپتەپ كوردىم. ەگەر 2016-جىلعى نارىقتاعى جاعداي بويىنشا ەسەپتەسەك، تەمەكى اينالىمىنىڭ 1 پايىزى شامامەن 22-23 ميلليارد دانا تەمەكى. ول 11 ميلليون قوراپ بولادى. تەمەكىنىڭ ورتاشا باعاسى شامامەن 300 تەڭگە دەسەك، 1 پايىز شامامەن 3,3 ميلليارد تەڭگە بولادى»، - دەدى سمايىلوۆ.
سونىمەن قاتار، ساراپشى اكسيز بەن قوسىمشا قۇن سالىعى بويىنشا جوعالعان قاراجاتتى ەسەپتەگەن.
سمايىلوۆتىڭ مالىمەتىنە سۇيەنسەك، بۇل جاعدايدا اكتسيزدەر بويىنشا مەملەكەتكە 1,3 ميلليارد تەڭگە كىرىس كىرمەگەن، ال قوسىمشا قۇن سالىعى بويىنشا مەملەكەت 350 ميلليون تەڭگە جوعالتقان.
ايتا كەتەيىك، بۇگىن ق ر قارجى مينيسترلىگىنىڭ مەملەكەتتىك كىرىستەر كوميتەتىنە (م ك ك) قاراستى ەكونوميكالىق تەرگەۋلەر قىزمەتىنىڭ قىزمەتكەرلەرى وڭتۇستىك قازاقستان وبلىسى اقسۋكەنت اۋىلىندا كونترافاكتىلى تەمەكى شىعاراتىن ءىرى ءوندىرىستى اشكەرەلەپ، جاپقانىن حابارلاعان بولاتىنبىز.
ۆەدومستۆو دەرەكتەرىنە سۇيەنسەك، مۇنداي اۋقىمداعى فابريكا قازاقستاندا العاش رەت اشكەرەلەنىپ وتىر.
اۆتور: الماس مۇقاش ۇلى
