دىنىمىزدە اق شاشتى نەلىكتەن جۇلۋعا بولمايتىنى ايتىلعان

استانا. قازاقپارات - حانافي ءمازحابىندا ادەمى كورىنۋ ءۇشىن بولماسا، از كولەمدە (ءبىر- ەكى تال) اق شاشتى جۇلۋدىڭ اعاتتىعى جوق. كوپ مولشەردەگى اق شاشتى جۇلۋ - ماكرۋھ.

الايدا، ءدىن عۇلامالارىنىڭ باسىم كوپشىلىگى از دا بولسا، كوپ تە بولسا اق شاشتى جۇلۋدى ماكرۋھ سانايدى. ويتكەنى پايعامبارىمىز مۇحاممەد عالەيھيسسالام بىلاي دەگەن:

«اق شاشتى جۇلماڭدار. شىنىندا ول - مۇسىلماننىڭ نۇرى. كىمنىڭ يسلام جولىندا ءبىر تال شاشى اعارعان بولسا، اللا تاعالا سول ءبىر تال شاشى ءۇشىن وعان ساۋاپ جازىپ، سول ءبىر تال شاشى سەبەپتى ونىڭ قاتەلىكتەرىن كەشىرەدى. جانە سونىڭ ارقاسىندا دارەجەسىن كوتەرىپ قويادى» .

ساقالىنا اق تۇسكەن ەڭ العاشقى كىسى - يبراھيم پايعامبار (ع. س. ) ەكەن. ساقالىنداعى اقتى كورگەن پايعامبار راببىسىنا:

- بۇل نە، راببىم؟ - دەپ سۇرايدى.

- بۇل - سالماقتىلىقتىڭ بەلگىسى، يبراھيم، - دەپ جاۋاپ بەرەدى جاراتقان اللا. سوندا يبراھيم حاليلۋللا:

- ۋا راببىم، ولاي بولسا، مەنىڭ سالماقتىلىعىمدى ارتتىرا گور - دەپ تىلەك بىلدىرگەن ەكەن.

وسى ريۋاياتتىڭ اراپشا ماتىنىندەگى « ءۋاقاار- وَقَارٌ » سوزىنە عالىمدار: «اقىل توقتاتىپ، ءار ىسىندە قىراعى بولۋ» دەپ تۇسىنىكتەمە بەرگەن.

ەندەشە، يسلامدا شاش- ساقالعا اقتىڭ ءتۇسۋىن ءبىر سوزبەن ايتقاندا: اقىل توقتاتقاندىقتىڭ بەلگىسى دەپ تۇسىندىرەدى. بۇل قىمسىناتىن نارسە ەمەس. شاشىڭىزدا پايدا بولعان اق شاشتاردى جۇلعاننان گورى، قىنا سەكىلدى تابيعي شاش بوياۋ قولدانعان ابزال. ونىڭ ۇستىنە، اق شاشتى جۇلعان سايىن كوبەيەتىنى ءمالىم.

 دەگەنمەن دە، جاستاردا، اسىرەسە بوزبالا شاعىندا نە ودان دا جاس كەزدە اق شاشتىڭ پايدا بولۋى -  دەنەدەگى ورگانيزمنىڭ بۇزىلۋىنىڭ كورسەتكىشى دەيدى مەديتسينادا. مۇنداي جاعدايدا ارنايى تريحولوگ مامانعا كورىنگەن دۇرىس، دەپ جازادى islam.kz.