وپا- دالاپتى جارنامالاعان ديماش سىنعا قالدى - كەسكىن

استانا. قازاقپارات - ديماش قۇدايبەرگەننىڭ تانىمالدىعى كۇن ەمەس، مينۋت ساناپ ارتىپ جاتقانداي. ول اتى الەمگە ءماشھۇر دجەكي چانمەن كەزدەسىپ، اتاعى جەر جارعان لارا فابياننىڭ شاقىرتۋىنا يە بولدى.

 47 ەلگە تارايتىن جۋرنال مۇقاباسىنا شىعىپ، گولليۆۋدتىق ءفيلمنىڭ ساۋندترەگىن ورىندادى. ايتا بەرسەڭ كوپ. بۇل تۋرالى Stan.kz حابارلايدى.

 ودان بولەك، ديماش Beauty Secret كوسمەتيكالىق برەندىنىڭ كەلبەتىنە اينالدى. جەلىدە ديماشتىڭ وپا- دالاپتى جارنامالاعان ءساتى پايدا بولدى.

وسى كۇنگە دەيىن تەك ماقتاۋ ءسوز ەستىگەن ديماش بۇل جولى ەكىجاقتى پىكىردىڭ ورتاسىندا قالدى.

جەلىدەگىلەردىڭ ءبىر توبى كوسمەتيكالىق زاتتاردى جارنامالاۋ قازاق جىگىتىنە ءتان ەمەستىگىن ايتىپ جاتىر. ەندىگىلەر ەرەكشە دارىن يەسىنە قولداۋ ءبىلدىرىپ، ونى قورعاشتادى.

«ديماش، نەگە ايەلدەر كوسمەتيكاسىن جارنامالاۋعا كەلىستىڭ؟ ەندى ارتىڭنان ءتۇرلى ءسوز ەرەدى. جاقسى ۇسىنىستى كۇتپەدىڭ بە؟ ءالى- اق تالاي ۇسىنىس الاسىڭ"، "دالاپ نەمەسە ەرىنگە ارنالعان بالزام. ماعان ۇنامادى، قازاق جىگىتتەرى مۇنى تۇسىنبەيدى عوي، ديماش»، - دەيدى ديماشقا نارازى بولعاندار.