وزگەنىڭ اعزاسىمەن جۇرگەن قازاقستاندىقتار يسپانياداعى ترانسپلانت- ويىندارعا قاتىسادى
2016 -جىلى قازاقستان حالقى اسسامبلەياسىنىڭ كەزەكتى سەسسياسىنا قاتىسا وتىرىپ، جانىبەك وسپانوۆ پرەزيدەنت نۇرسۇلتان نازاربايەۆقا دۇنيەجۇزىلىك ترانسپلانت- ويىندارىنا قاتىسامىن دەپ ۋادە بەرگەن ەدى. جانىبەك وسى ۋادەسىن ورىنداۋ ءۇشىن بۇكىل كۇش- جىگەرىن سالىپ ءجۇر، دەپ حابارلايدى قازاقپارات.
2017 -جىلدىڭ ماۋسىم ايىندا 43 جاستاعى جانىبەك دونوردىڭ جۇرەگى مەن بۇيرەگىن العان تاعى بەس اداممەن بىرگە يسپانيادا وتەتىن ترانسپلانت- ويىندارعا قاتىسپاق. قازاقستان دۇنيەجۇزىلىك وسىنداي جارىسقا العاش رەت اتتانباق.
«جارىسقا التى ادام بارادى. مەن جۇزۋدەن، تەننيس پەن بوۋلينگ جارىستارىنان كۇش سىنايمىن. وتكەن جىلى قازاقستان حالقى اسسامبلەياسىنىڭ سەسسياسىندا مەن پرەزيدەنت نۇرسۇلتان نازاربايەۆقا «مەنىڭ ارمانىم - وسى جارىستاردا قازاقستاننىڭ تۋىن كوككە جەلبىرەتۋ» دەپ ايتقان ەدىم. ۋادەمدى ورىنداۋعا ءبىر قادام قالدى»، - دەيدى ول.
يسپانيادان ورالعان سوڭ، جانىبەك ءوزى سياقتى دونور اعزا العان ادامدارمەن بىرگە ترانسپلانتاتسيادان كەيىنگى سپورت فەدەراتسياسىن قۇرماق ەكەن. ياعني، ۇلتتىق فەدەراتسيا قۇرا وتىرىپ، قازاقستان مەديتسيناسىنداعى سوڭعى جاڭالىقتاردى الەمگە تانىتقىسى كەلەدى.
بولعان جايتتى ءبىر ەسكە الىپ وتسەك، 2012 -جىلدىڭ 6 - تامىزىندا استانا قالاسىندا 46 جاستاعى ايەل ميىنا قان قۇيىلىپ، اۋرۋحاناعا تۇسەدى. مەديتسينا تىلىمەن ايتساق، ول «ميى ولگەن ادام» ەدى. ءبىراق ونىڭ جۇرەگى ءبىرقالىپتى سوعۋىن توقتاتپاعان. قوستاناي وبلىسى، رۋدنىي قالاسىنىڭ 38 جاستاعى تۇرعىنى جانىبەك وسپانوۆقا جەدەل تۇردە جۇرەك اۋىستىرۋ كەرەك ەكەنىن بىلەتىن دارىگەرلەر، بىردەن ءتيىستى شارالاردى قولعا الادى. ولار ەڭ الدىمەن، 46 جاستاعى ايەلدىڭ ۇلى - يگور ۆوروتنيكوۆقا حابار بەرەدى.
«انامنىڭ ميى ولگەنىن حابارلاپ، سوعىپ تۇرعان جۇرەگىن باسقا ادامعا اۋىستىرىپ سالۋعا بولاتىنىن ايتتى. مەن ءالى دە بولسا اپپاراتپەن ونىڭ ءومىرىن ساقتاپ تۇرۋعا بولاتىن شىعار دەپ ويلادىم. الايدا، بىزدە ونداي اپپارات جوق ەكەن. كوپ ويلاندىم. سودان ناۋقاستى كورۋگە رۇقسات بەردى. ويىمنان انام كەتپەدى. ول ادامدى، ونىڭ وتباسىن كورىپ، انام بۇل شەشىمىمە قارسى بولمايتىنىن ءتۇسىندىم. اتتەڭ، انام سول كەزدە ەشكىمنىڭ سۇراعىنا جاۋاپ قاتا المايتىن كۇيدە ەدى... ايتپەسە، شەشىمىمدى قولدايتىن ەدى. ال قازىر جانىبەككە قاراپ، انامنىڭ جۇرەگى سوعىپ تۇرعانىن بىلەمىن. كەشە تۇندە انامنىڭ جۇرەگى ءومىر سىيلاعان ادامنىڭ جارى دۇنيەگە قىز بالا الىپ كەلدى. انامنىڭ جۇرەگى سوعىپ تۇرعان ادام بولاشاقتا تاعى ءبىر «انانى» تاربيەلەيدى»، - دەگەن ەدى 2012 -جىلى سۇحبات بەرگەن يگور.
«ءتورت جىل بۇرىن ماعان بوتەن ادامنىڭ جۇرەگىن سالعان ەدى... قازىر دەنساۋلىعىم وتە جاقسى دەۋگە بولادى. بىلتىر مەن ەۋروپاداعى دوستارىما بارىپ كەلدىم، ياعني، الىس جەرلەرگە بارىپ- كەلىپ تۇرۋعا دەنساۋلىعىم جاراپ تۇر. بيىل جازدا فينلياندياعا سپورت سيمپوزيۋمىنا باردىم. جۇرەگىم بۇنىڭ بارىنە مۇمكىندىك بەرەدى. قازىر سپورت - كۇندەلىكتى سەرىگىم دەۋگە بولادى. فينلياندياعا بارعاندا، ەۋروپانىڭ كلينيكالارى مەن سياقتى ادامدار ءۇشىن سپورت - قابىلدايتىن ءدارى سياقتى وتە ماڭىزدى ەكەنىن عىلىمي تۇردە دالەلدەپ بەردى» - دەيدى جانىبەك دەنساۋلىعى تۋرالى ايتا وتىرىپ.
اۆتور: كەنجەكەي توقتامۇرات قىزى
