ءوزى قايتىس بولسا دا، جەتى ادامعا ءومىر سىيلاپ كەتتى
وسىدان 10 كۇن بۇرىن جۇرەك تالماسىنان كوز جۇمعان اقتوبەلىك تۇرعىن، ءوزىنىڭ جەتى دەنە مۇشەسىن وزگە ناۋقاستارعا بەرۋگە كەلىسىمىن بەرگەن. بۇل تۋرالى 31 - ارنا حابارلايدى.
مايىتتىك دونوردان بۇيرەك، باۋىر، جۇرەك، كوز مۇشەلەرى الىنىپ، قازىر سول مۇشەلەردىڭ بارلىعى دا مۇقتاج ادامدارعا وتا ارقىلى سالىندى. ايتا كەتۋ كەرەك، مۇنداي وتالار الماتى، استانادان كەيىن اقتوبەدە بيىل ءبىرىنشى رەت جاسالدى.
31 جاستاعى گۇلناز وسىدان التى جىل بۇرىن بۇيرەك اۋرۋىنا شالدىققان. قانشا ەمدەلۋدىڭ جولىن ىزدەپ اۋرۋحانالاردىڭ ەسىگىن توزدىرعانىمەن ەمىنە شيپا تاپپاپتى. سىرقاتى ۇدەپ، ەكى بۇيرەگى دە بىردەي ىستەن شىعىپ، اقىرى سوڭعى بەس جىل بويى ديالەزگە تاڭىلدىم دەيدى. قازىر گۇلناز مايىتتىك دونور ارقىلى بۇيرەگىن اۋىستىرعانداردىڭ ءبىرى. ءومىرى ۇزارعان گۇلنازدىڭ العىستان باسقا ايتار ءسوزى جوق.
«2011 -جىلدان بەرى اۋىرامىن، 6 جىل بولدى. ەڭ ءبىرىنشى اللاعا راحمەت ايتامىن. ەكىنشى مىنا دونور بەرگەن كىسىلەرگە راحمەت ايتامىن»، - دەيدى ەمدەلۋشى گۇلناز.
اقتوبە وبلىستىق اۋرۋحاناسىنىڭ ترانسپلانتولوگ دارىگەرىنىڭ ايتۋىنشا، ءمايىتتىڭ دەنە مۇشەلەرىن ءتىرى ادامعا سالۋ اقتوبەدە العاش رەت جاسالعان. بۇعان دەيىن تۋىستىق ءتىرى دونور ارقىلى جەتى ادامنىڭ باۋىرى اۋىستىرىلىپتى. ءبىراق قازىر باۋىرعا قاراعاندا كوپ جاعدايدا بۇيرەك اۋرۋىنا شالدىققاندار جانە اۋىستىرۋدى قاجەت ەتەتىن ادامدار الدەقايدا كوپ، - دەيدى دارىگەرلەر. ال جەتى مۇشەسىن بىردەي دونورلىققا بەرگەن اقتوبەلىك ايەلدىڭ قازىر ەكى بۇيرەگى ەكى ادامعا جاڭا ءومىر سىيلاعان. جالپى جىل باسىنان بەرى اقتوبەدە ءدال وسىنداي مايىتتىك دونور ارقىلى بۇيرەك اۋىستىرۋعا ءتورت وتا جاسالىپ، ءساتتى شىققان.
«45 جاستاعى ايەلدىڭ ورگاندارىن الدىق. مۋلتيورگاندى زابور دەپ اتالادى. اقتوبەدە ءبىرىنشى رەت جاسالدى ونداي وتا. ەكى بۇيرەك اقتوبەدە قالدى. ءوزىمىزدىڭ پاتسيەنتتەرگە جاسالدى. قالعان ورگاندار استانادا مەديتسينالىق ورتالىقتاردا جاسالدى، اۋىستىرىلدى»، - دەيدى دارىگەر مىلتىقباي رىسماحانوۆ.
قازىرگى تاڭدا ەلىمىزدە بۇيرەك اۋىستىرۋدى قاجەت ەتەتىن 4000 قازاقستاندىق تىزىمدە تۇرسا، سونىڭ 300 گە جۋىعىن اقتوبەلىك ناۋقاستار قۇرايدى ەكەن. جانە سول تىزىمدە ەلىمىز بويىنشا باۋىر اۋىستىرۋدى كۇتىپ وتىرعان 1000 عا جۋىق ادام تاعى بار. دارىگەرلەردىڭ ايتۋىنشا، ەلىمىزدە مايىتتىك دونور قىزمەتى جاقسى دامىسا، سىرقات ادامداردىڭ ساۋىعۋى دا كوپ بولار ەدى دەيدى. ويتكەنى مۇنداي جاعدايدىڭ 70-80 پايىزىندا قايتىس بولعان ادامداردىڭ تۋىستارى رۇقسات بەرمەيدى ەكەن.
