التاي باتىر اۋىلىنىڭ كەلىنشەكتەرى قارىمدى كۇشتەرىن كورسەتىپ كوپشىلىكتى ءتانتى ەتتى
دەپ حابارلايدى قازاقپارات ءتىلشىسى.
التاي باتىر اۋىلىنداعى ناۋرىز مەرەكەسىن ءانۋار تايمانوۆ ۇيىمداستىردى. ول ءوز سىنىپتاستارىمەن اقىلداسا كەلە مۇشەل جاستى اتاپ ءوتىپ، اۋىلدىڭ اقساقالدارىنان باتا الۋدى ءجون كورگەن. ۇسىنىس جان- جاقتى قولداۋ تاۋىپ، 25 جاستاعى قىز- جىگىتتەر جينالدى. اۋىلعا اعاش ءۇي تىگىلىپ، التىباقان قۇرىلدى. ون مەترلىك داستارحان جايىلىپ، ناۋرىز كوجە اسىلدى.
«ناۋرىز مەرەكەسىنە وراي اۋىلدا ۇلتتىق ويىن تۇرلەرىنەن جارىس ءوتتى. گىر كوتەرۋ، قول كۇرەس، جاياۋ جارىس، ارقان تارتۋ، ۇستەل تەننيسى، قازاقشا كۇرەستەن جارىس ءوتتى. ايەلدەر اراسىندا گىر كوتەرۋ مەن قول كۇرەسى بولدى. بۇل جارىستارعا اۋىلدىڭ بارلىعىن قاتىستىرۋ ماقساتىن كوزدەدىك. اۋىل ادامدارى كوشە- كوشە بولىپ، جاستارىنا بايلانىستى ءبولىنىپ، سايىسقا ءتۇستى. گىردى 42 رەت كوتەرگەن قۇرداسىمىز جارقىنبەك مولداعاليەۆتىڭ اناسى قالامپىر قۇرمانيازوۆا جەڭىسكە جەتتى. ەكىنشى ورىندى دامەتكەن دۇيسەنبايەۆا الدى. ول 40 رەت كوتەردى. ال ءۇشىنشى ورىندى گىردى 20 رەت كوتەرگەن شولپان قالمەنوۆا الدى»، - دەدى انۋاربەك تايمانوۆ.
سول كۇنى قول كۇرەستەن ءبىرىنشى ورىندى دامەتكەن دۇيسەنوۆا، ەكىنشى ورىندى 19 جاستاعى اسىلاي قۇلبايەۆا، ءۇشىنشى ورىندى ۇلبوسىن مولدابايەۆا جەڭىپ الدى.
«جىل سايىن ەر ادامدار اراسىندا گىر كوتەرۋدەن جارىس وتەدى. 1992 -جىلى تۋعان قىز- جىگىتتەر اقىلداسا كەلە، ايەلدەر اراسىندا دا جارىس وتكىزۋدى ءجون كوردىك. بارلىعى كەلىستى. ءبىز قىزىقتى وتەتىنىنە سەندىك. سونىمەن قاتار، 15 كۇن بۇرىن اۋىلداعى مەكتەپ، دۇكەنگە حابارلاندىرۋ ىلدىك. وتكەن جىلى ءوز وتباسىمنىڭ اتىنان ناۋرىز مەرەكەسىن وتكىزدىم. ول كەزدە ۋاز كولىگىن سۇيرەپ، ارقان تارتۋ، گىر كوتەرۋدەن جارىس ءوتتى. تاي جارىس تا ۇيىمداستىرىلدى. ءبارى ەر ادامدارعا ارنالدى. ال بيىل قۇرداستارىمىز جينالدى. ءبىز مەكتەپ كەزىندە ءجۇرىپ- اق سپورتقا قىزىعىپ، ءتۇرلى جارىستارعا قاتىسۋشى ەدىك. ناۋرىز مەرەكەسى - جىل باسى. سول كۇندە ەرەكشە اتاپ ءوتىپ، ۇلكەندەردىڭ باتاسىن الۋدى كوزدەگەن ەدىك. ءبارى ءساتتى ءوتتى، اۋىل ريزا»، - دەدى انۋاربەك تايمانوۆ.
اۋىل حالقى بۇل كۇن ءۇشىن بالالارىنا ريزاشىلىعىن ءبىلدىرىپ وتىر. گىر كوتەرۋدە ەرەكشەلەنىپ، 8 كەلىلىك تەمىردى قوس قولىمەن 42 رەت كوتەرگەن قالامپىر قۇرمانيازوۆا بۇرىن دا ءبىر تويدا ءدال وسىنداي سايىس بولعانىن ەسكە الدى. ول كەزدە 30 رەت كوتەرىپ، ءبىرىنشى ورىن العان. ال بيىل ءوز جەتىستىگىن جاڭارتىپ، اۋىل حالقىن تاعى ءبىر تاڭ قالدىردى.
«گىر كوتەرىپ، تانىمال بولۋ ويىمىزدا بولعان جوق. مەنىڭ بالام جارقىنبەك مولداعاليەۆ تە بيىل 25-كە تولىپ جاتىر. ول سىنىپتاستارىمەن ۇيىمداستىرىپ، ماعان قاتىسۋعا ءوتىنىش جاسادى. العاشىندا اۋىرىپ جۇرگەنىمدى ايتىپ ەدىم، سەنىم ءبىلدىرىپ، قاتىسۋدى ءجون سانادىم. ەكىنشى ورىن العان مەنىڭ كەلىنىم دامەتكەن دۇيسەنبايەۆا. مەن وتباسىنىڭ ۇلكەن كەلىنىمىن. ءبىز سپورتپەن شۇعىلدانبايمىز، ءبىراق اۋىلدا قارا جۇمىستىڭ ءبارىن جاسايمىز. وتاعاسىنىڭ قاسىندا ءجۇرىپ كىرپىش باسامىز، ءۇي سالامىز. سونىڭ ءبارى قارا كۇشتى قاجەت ەتەتىن جۇمىس»، - دەدى قالامپىر قۇرمانيازوۆا.
ءتورت بالانىڭ اناسى ناۋرىز مەرەكەسى اۋىل ءۇشىن قىزىققا تولى ءارى ۇلتتىق سالت- ءداستۇردى جاڭعىرتاتىن باستى مەرەكەگە اينالعان ايتتى. بۇل كۇنى اۋىل حالقى تۇگەل كوشەگە شىعىپ، ءبىر- ءبىرىن قۇتتىقتاۋدى پارىز سانايدى.
اۆتور: التىناي ساعىندىقوۆا
