قازاقستاندا قانداي قىلمىستار ءۇشىن ازاماتتىقتان ايىرۋى مۇمكىن؟
باسپا ءسوز ءماسليحاتى بارىسىندا ق ر ادىلەت ۆيتسە-ءمينيسترى زاۋرەش بايمولدينا كونستيتۋتسيانىڭ 10-بابىنداعى كونستيتۋتسيالىق تۇزەتۋلەرگە سايكەس، تەرروريستىك قىلمىستار جاساعانى ءۇشىن، سونداي-اق قازاقستان رەسپۋبليكاسىنىڭ ومىرلىك ماڭىزى بار مۇددەلەرىنە وزگە دە اۋىر زيان كەلتىرگەنى ءۇشىن ازاماتتىقتان ايىرۋعا سوتتىڭ شەشىمىمەن عانا جول بەرىلەتىنى ەسكەرىلگەنىن اتاپ ءوتتى.
وسىعان بايلانىستى «ەلدىڭ ومىرلىك ماڭىزى بار مۇددەلەرى» ۇعىمىن جانە قىلمىستار تىزبەسىن ايقىنداۋ قاجەتتىگى تۋىندادى. مينيستر ورىنباسارىنىڭ سوزىنە قاراعاندا، زاڭ جوباسىنىڭ تۇجىرىمداماسى ۆەدومستۆوارالىق كوميسسيانىڭ تالقىلاۋىنا شىعارىلعان جوق. ازىرگە ۇسىنىستاردىڭ بارلىعى مەملەكەتتىك ورگاندار تاراپىنان جاسالدى. سوندىقتان الداعى تالقىلاۋلاردى ەسكەرە وتىرىپ، باپتاردىڭ سانى ءالى دە وزگەرۋى مۇمكىن. «ءبىز ق ر ق ك- گە ەشبىر جاڭا قۇرامدى، جاڭا باپتى ۇسىنىپ وتىرعانىمىز جوق. بۇلاردىڭ بارلىعى قولدانىستاعى قۇرامدار جانە وسىعان تەك قوسىمشا ەنگىزىپ وتىرمىز. ياعني ازاماتتىقتان ايىرۋ تۇرىندەگى قوسىمشا جازا ەسكەرىلگەن»، - دەدى بايمولدينا.
وسى ورايدا ول كەز كەلگەن ەلدىڭ ومىرلىك ماڭىزى بار مۇددەلەرىنە زيان كەلتىرۋ ساناتىنا مەملەكەتتىڭ اۋماقتىق تۇتاستىعىنا، كونستيتۋتسيالىق قۇرىلىستىڭ بەرىكتىگىنە، الەۋمەتتىك، ساياسي، ەكونوميكالىق تۇراقتىلىققا، قورعانىس قابىلەتتىگىنە، قاۋىپسىزدىككە جانە باسقا دا قۇندىلىقتارعا قاستاندىق جاساۋ سەكىلدى ءىس-قيمىلدار جاتاتىنىن جەتكىزدى.
قازىرگى كەزدە جاپپاي قىرىپ-جويۋ قارۋىن ءوندىرۋ، يەمدەنۋ نەمەسە وتكىزۋ؛ سوعىس جۇرگىزۋدىڭ تىيىم سالىنعان قۇرالدارى مەن ادىستەرىن قولدانۋ؛ سوعىس زاڭدارى مەن داستۇرلەرىن بۇزۋ؛ قارۋلى قاقتىعىستار ۋاقىتىندا حالىقارالىق گۋمانيتارلىق قۇقىق نورمالارىن قىلمىستىق بۇزۋشىلىقتار؛ قارۋلى قاقتىعىس ۋاقىتىنداعى ارەكەتسىزدىك نە قىلمىستىق بۇيرىق بەرۋ؛ گەنوتسيد؛ ەكوتسيد؛ شەتەلدىك قارۋلى قاقتىعىستارعا قاتىسۋ؛ الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ؛ ەكسترەميستىك توپ قۇرۋ، وعان باسشىلىق ەتۋ نەمەسە ونىڭ ارەكەتىنە قاتىسۋ سەكىلدى ءىس-قيمىلدار ءۇشىن ازاماتتىقتان ايىرۋ ۇسىنىلۋدا.
اۆتور: رۋسلان عابباسوۆ
