قازاقستاندىقتاردىڭ دەنساۋلىعى نەگە جاقسارماي وتىرعانى بەلگىلى بولدى
بۇنداي جاعدايدىڭ بىردەن ءبىر سەبەبى - جەمقورلىق. بۇل تۋرالى بۇگىن مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى اليك شپەكبايەۆ ءمالىم ەتتى، دەپ حابارلايدى قازاقپارات.
«سوڭعى ون جىلدا وسى سالانىڭ قارجىلاندىرىلۋى بەس ەسەگە ارتقان ەكەن. 2005-جىلعى 191 ميلليارد تەڭگەدەن 2016-جىلعى 1 تريلليون تەڭگەگە دەيىن ءوستى. الايدا، دۇنيەجۇزىلىك دەنساۋلىق ساقتاۋ ۇيىمىنىڭ حالىقارالىق رەيتينگىسىنە جۇگىنسەك، حالىقتىڭ دەنساۋلىعى بويىنشا قازاقستان 145 ەلدىڭ ىشىندە 111-ورىندا تۇر. بۇنداي جاعدايدىڭ بىردەن ءبىر سەبەبى - جەمقورلىق.
2016-جىلى دەنساۋلىق ساقتاۋ سالاسىندا 80 لاۋازىم يەسىنە قاتىستى 200 جەمقورلىق قىلمىسى تىركەلدى. ونىڭ ىشىندە، 22 ادام سوتتالدى. كوبىنەسە، بۇل كوپ ەپيزودتى قىلمىستىق ىستەر»، - دەيدى شپەكبايەۆ.
ونىڭ ايتۋىنشا، سوتتالعانداردىڭ كوبى پاۆلودار، قوستاناي، وڭتۇستىك قازاقستان، قىزىلوردا وبلىستارىندا جانە الماتى قالاسىندا تىركەلگەن.
اگەنتتىك جۇرگىزگەن سىبايلاس جەمقورلىققا قارسى مونيتورينگ كورسەتكەندەي، دەنساۋلىق ساقتاۋ سالاسىندا جەمقورلىققا كوبىنە اتتەستاتسيادان وتكىزۋ بولىمدەرىنىڭ جەتەكشىلەرى، مەديتسينا ورتالىقتارىنىڭ ديرەكتورلارى، ءارتۇرلى انىقتاما بەرەتىن مەديتسينالىق قىزمەتكەرلەر بارادى ەكەن.
«وسى جىلدىڭ ەكى ايىندا جەمقورلىققا قارسى كۇرەس قىزمەتى دەنساۋلىق ساقتاۋ سالاسىندا قارجى قىلمىسىن جاساعان 16 ادامدى ۇستاعان»، - دەدى مالىمەتتى تولىقتىرا وتىرىپ اليك شپەكبايەۆ.
اۆتور: كەنجەكەي توقتامۇرات قىزى
