الماتى وبلىسىنداعى باقباقتى اۋىلىن قۇم باسۋ قاۋپى بار

تالدىقورعان. قازاقپارات - الماتى وبلىسىنداعى باقباقتى اۋىلىنا قۇم باسۋ قاۋپى ءتونىپ تۇر. وسىعان وراي، بالقاش اۋدانىنا قاراستى ەلدى مەكەندە قۇم توقتاتۋ جۇمىستارى جۇرگىزىلىپ جاتىر،

 دەپ حابارلايدى قازاقپارات ءتىلشىسى.

 مۇنداي جاعداي بۇل ەلدى مەكەندە جىلدا قايتالانادى. سەبەبى، ايماقتىڭ جەرى قۇمدى. ءارى جەلى دە تولاستامايدى. 5 مىڭنان استام تۇرعىنى بار باقباقتى اۋىلىنىڭ حالقى مۇنداي جاعدايعا بويلارىنىڭ ۇيرەنگەندەرىن ايتادى.

 «ەندى، قۇم ساۋلاعاندا كوزىمىزگە دە كىرەدى. بالالارىمىزدىڭ ءۇستى- باسى شاڭ، توپىراق بولادى. جىلدا تازارتىپ جاتىر. ايتپەسە سىرتقى قاقپانىڭ جارىم بەلىنە دەيىن كەلەدى توپىراق»، - دەيدى قايىپجامال مۇقانوۆا.

 قۇم توقتاتۋ باعىتىندا قولعا الىنعان جۇمىستارعا وراي، قازىر ايماققا كوپتەپ كوشەتتەر ەگىلۋدە. باقباقتىنىڭ باتىسىنداعى 1 گەكتار جەرگە 14 مىڭ ءتۇپ سەكسەۋىل مەن 2 مىڭداي جيدە كوشەت وتىرعىزىلدى.

 «بىلتىر 20-25 ادام وسى جەردە جۇمىس ىستەدى، ولار بيىل دا جالعاسۋدا. قۇم توقتاتۋ جۇمىستارى جۇرگىزىلۋدە. تاعى دا اعاشتار ەگىپ، قۇدىق ورناتىپ، سول جەردى كوگالداندىرساق دەگەن ويىمىز بار»، - دەيدى باقباقتى اۋىلدىق وكرۋگى اكىمدىگىنىڭ باس مامانى اسقار مىرزاحمەتوۆ.

 اۋىل ماڭىنا ەكسپەريمەنت ەسەبىندە وتىرعىزىلعان سەكسەۋىل كوشەتتەرىنىڭ 50-60 پايىزى تامىر الىپ كەتۋى مۇمكىن، دەيدى ماماندار. باقباقتىلىقتار قۇم توقتاتۋ جۇمىستارىنىڭ ويداعىداي جۇزەگە اساتىنىنا سەنىمدى.

 اۆتور: سامال قابىشيەۆا