قازاقستان پرەزيدەنتى دۋباي حالىقارالىق قارجى ورتالىعىندا بولدى
دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسى كەزدەسۋ بارىسىندا DIFC قىزمەتىمەن جانە ورتالىقتىڭ بۇدان ءارى قاراي دامۋ پەرسپەكتيۆاسىمەن تانىستى. قازاقستان پرەزيدەنتىنە دۋباي حالىقارالىق قارجى ورتالىعى قۇرىلعان كەزەڭنەن بەرى ونىڭ دۋباي قالاسىنىڭ ىشكى جالپى ونىمىنە قوسقان ۇلەسى 8 پايىزعا جەتكەنى تۋرالى مالىمەت بەرىلدى. نۇرسۇلتان نازاربايەۆ استانا حالىقارالىق قارجى ورتالىعىنىڭ جۇمىسىن ۇيىمداستىرۋ بارىسىندا ءبىزدىڭ ەلىمىز بىرىككەن اراب امىرلىكتەرىنىڭ تاجىريبەسىن زەرتتەپ، قولدانىپ وتىرعانىن اتاپ ءوتتى. سونداي- اق، ورتالىقتىڭ جۇمىسىن ودان ءارى ءتيىمدى جۇرگىزۋ ماقساتىمەن ءبىرقاتار شارالار ىسكە اسىرىلعانىن ايتتى. قازاقستان پرەزيدەنتى استانا ورتالىعى بازاسىندا قۇرىلاتىن ەۋرازيا ايماعىنداعى جەتەكشى قارجى قۇرىلىمى رەتىندە استانا حالىقارالىق قارجى ورتالىعىن دامىتۋ جونىندەگى ءوز ويلارىن ورتاعا سالدى. كەلىسسوز سوڭىندا تاراپتار ەكىجاقتى ىنتىماقتاستىقتىڭ ناتيجەلەرى مەن ودان ءارى دامۋ پەرسپەكتيۆالارىن تالقىلادى.
