قازاق سانىنىڭ ارتتا قالعانىن وزبەكتەرگە قاراپ بايقاۋعا بولادى - ولجاس سۇلەيمەنوۆ

استانا. قازاقپارات - قازاقستاننىڭ ەڭبەك ەرى، قوعام قايراتكەرى، جازۋشى ولجاس سۇلەيمەنوۆتىڭ ايتۋىنشا، قازاق حالقى سانىنىڭ وسپەي قالعانىنا ەكولوگيا دا قاتتى اسەر ەتتى، دەپ حابارلايدى قازاقپارات ءتىلشىسى.

 «ماسەلەن، 1926 -جىلى قازاقتىڭ سانى 6 ميلليون 200 مىڭ ادام بولعان. سول كەزدەگى قۇجاتتاردا قازاقتار تۇركى الەمىندەگى سانى ەڭ كوپ ءارى ءىرى حالىق رەتىندە كورسەتىلگەن ەدى. ال وزبەكتەردىڭ سانى 4 ميلليون بولدى. ەندى، قاراڭىز، اراعا 90 جىل سالىپ، قازاقتاردىڭ سانى 4 ميلليون ادامعا ءوستى. قازىر ەلىمىزدە شامامەن 10 ميللليون قازاق بار. وزبەك حالقى بولسا، 31 ميلليونعا وسكەن. نەگىزى، ولار دا ۇجىمداستىرۋدان ءوتتى، رەپرەسسيالارعا ۇشىرادى. الايدا، قازاق حالقى سەمەي پوليگونى سياقتى ۇلكەن قاسىرەتتى باستان كەشىردى. وعان كومىر، مۇناي جانە تاعى باسقا تابيعات بايلىقتارىن جابايىلىق ادىسپەن ءوندىرۋدى تاعى قوسىڭىز. بۇنىڭ ءبارى حالىقتىڭ دەنساۋلىعىنا اسەر ەتپەي قويمادى. قازىرگى جاستار اراسىندا بالا تابا الماي جۇرگەندەر بارشىلىق. ول دا - بۇعان دەيىنگى ەكولوگيالىق قاتەلىكتەردىڭ كەسىرى»، - دەدى ولجاس ومار ۇلى بۇگىن استاناداعى حالىقارالىق ەكولوگيالىق كونگرەستە.

 ونىڭ ايتۋىنشا، ءدال وسى ماسەلەنى ءاربىر مينيستر، ءاربىر دەپۋتات ەستەن شىعارماۋى قاجەت. «قازاق حالقىنىڭ نە سەبەپتى جانە قانداي جاعدايعا تاپ بولعانىن قاپەردەن شىعارمايتىن ادام عانا ەلگە ادال قىزمەت ەتىپ، ءوز ۇلەسىن قوسا الادى»، - دەپ اتاپ كورسەتتى قوعام قايراتكەرى. وسى ورايدا جازۋشى ءاربىر قازاقستاندىقتى ءبىر تال اعاش ەگۋگە ۇندەدى. ەلىمىزدە 18 ميلليونعا جۋىق اعاش وتىرعىزىلسا، ەل ەكولوگياسى اجەپتاۋىر جاقساراتىن ەدى.

اۆتور: ارمان اسقاروۆ