مىرزاتاي جولداسبەكوۆ: تەلەارنالار جىلارمان، قايعىلى تۇرىك فيلمدەرىمەن جالىقتىردى

استانا. قازاقپارات - كەشە استانادا «حابار» اگەنتتىگىنىڭ قۇرامىنداعى جاڭا «ەل ارنا» تەلەارناسىنىڭ تۇساۋى كەسىلدى. ونىڭ ەفيرىنەن تەك وتاندىق دەرەكتى فيلمدەر، شىعارماشىلىق لەنتالار مەن سەريالدار كورسەتىلەتىن بولادى.

 بۇل تۋرالى Sputnik قازاقستان حابارلايدى.

تۇساۋكەسەرگە قاتىسقان مەملەكەت جانە قوعام قايراتكەرى مىرزاتاي جولداسبەكوۆ جاڭا ارناعا ۇلكەن ءۇمىت ارتىلىپ وتىرعانىن ايتتى.

«جاسىراتىنى جوق، كەيىنگى كەزدە قازاقستاننىڭ تەلەارنالارىندا ىلعي ءبىر بايانسىز ماحاببات، تۇرلاۋسىز ءومىر كەشكەن، جىلارمان، قايعىلى تۇرىكتىڭ فيلمدەرىن كورسەتۋمەن جالىقتىردى. بىتپەيتىن ءبىر سونداي فيلمدەرگە تاپ بولدىق. حالقىمىز، اسىرەسە، اۋىلداعى حالىق سۋساپ وتىر. قالادا ايتەۋىر كينوتەاترلار بار، ال اۋىلدا ولار جوق. ەندى اسىلدارىمىز جايلى فيلمدەردى كورەتىن بولامىز. حالىقتىڭ كوكەيىندەگىسىن تابا بىلسەڭدەر، جامان بولمايدى. نەسىن جاسىرامىز، قازاققا قىزمەت ەتەتىن ۋاقىت بولدى عوي. وزگەنىڭ ماڭدايىنان سيپاپ، وزگەنى جەتەكتەپ، ءوزىن جارقىلقاماي قالعان حالىقپىز. قازاقتى قازاقتان باسقا ەشكىم جارىلقامايدى. سوندىقتان قازاقتىڭ ماڭدايىنان سيپاپ، ارقاسىنان قاعاتىن ۋاقىت كەلدى»، - دەدى قوعام قايراتكەرى.

مىرزاتاي جولداسبەكوۆ تۇتاس فيلمگە ارقاۋ بولاتىن قازاقتا ءبىرتۋار تۇلعالار كوپ ەكەنىن اتاپ ءوتتى.

«ءبىزدىڭ تاريحىمىزدا نەبىر تۇلعالار بار. دانالارىمىز تۋرالى فيلمدەر تۇسىرىلسە دەيمىن. كۇلتەگىن باتىر، بەر جاعىندا بۇقار جىراۋ، كەشەگى حالىقتى وتىرعىزىپ، تۇرعىزعان ءۇش بي تۋرالى تۇسىرۋگە بولادى. بۇگىن ءشامشى تۋرالى فيلمدى كورەدى ەكەنبىز. مۇقاعالي تۋرالى دا فيلم تۇسىرىلسە جاقسى بولادى»، - دەدى ول.

جاڭا تەلەارنا ءار ءتۇرلى جىلداردىڭ كينوتاسپالارىن ۇسىناتىن بولادى: «قازاق فيلم» كلاسسيكاسىنان باستاپ زاماناۋي كينوتۋىندىلارعا دەيىن، سونىمەن بىرگە مۇراعاتتىق جانە كوپشىلىككە اسا ءمالىم بولا قويماعان فيلمدەر. بۇدان بولەك، ارنانىڭ ەفيرىن وتاندىق رەجيسسەرلەردىڭ تەلەحيكايالارى دا تولىقتىرادى.