قىزىلوردادا وزبەك ەتنومادەني بىرلەستىگى ناۋرىز مەيرامىن تويلادى
- دەپ حابارلادى قازاقپارات ح ا ا ءتىلشىسى ق ح ا- نىڭ وبلىستىق وكىلدىگىنە سىلتەمە جاساپ.
مەرەكەلىك شاراعا قازاقستان حالقى اسسامبلەياسىنىڭ وبلىستاعى وكىلدەرى، ەتنومادەني بىرلەستىكتىڭ مۇشەلەرى مەن قالا تۇرعىندارى قاتىستى. ناۋرىز مەيرامىنىڭ وزبەكشە اتاۋى - ناۆرۋز بايرامىندا جەر ارقاسى كەڭىپ، جان- جانۋارلار، وسىمدىكتەر، كۇللى تىرشىلىك الەمى جاڭارىپ، قايتا تۇلەيتىن تابيعات مەرەكەسى بولىپ سانالادى. بۇل كۇنى بارشا جان جىل بويعى وتكەن- كەتكەن رەنىشتى كەشىرىپ، ءبىر- بىرىنە باقىت تىلەپ، اقساقالدار باتالارىن بەرەدى.
سالتاناتتى كەش جالىندى وزبەك انىمەن جانە قازاقشا بيمەن باستالدى. العى ءسوز وزبەك ەتنومادەني بىرلەستىگىنىڭ ارداگەرلەرى اشۋر حاميدوۆ پەن ناجميددين كارىمبايەۆقا بەرىلدى.
جيىلعان قاۋىمدى مەرەكەمەن قازاقستان حالقى اسسامبلەياسىنىڭ وبلىستاعى حاتشىلىعىنىڭ باسشىسى ءلايلا تورەشوۆا قۇتتىقتاپ، بىرلەستىكتىڭ ءتوراعاسى قاحار داداشيەۆقا العىس حات تابىستادى.
«كوكتەمنىڭ ۇلىق مەرەكەسى - ناۋرىزدىڭ ۇلتىمىز ءۇشىن ورنى بولەك. راسىمەن دە، «ۇلىس وڭ بولسىن! اق مول بولسىن!» دەگەن باتالى سوزدەن باستالاتىن مەيرامنىڭ يگىلىگى مەن قۋانىشى ەرەكشە. وسىنداي ۇلىق مەرەكەنى تەك قازاق حالقى ەمەس، سونىمەن بىرگە ورتالىق ازيا مەن تۇركىتىلدەس وزگە ەلدەر دە تويلايدى. ءار ەلدىڭ ءوز سالتى مەن ءداستۇرى بار. ۇلىستىڭ ۇلى كۇنى - ءاز ناۋرىز بارشامىزعا قۇتتى بولسىن!» - دەدى.
سونىمەن بىرگە، كوكتەمنىڭ جارقىن مەرەكەسىمەن ەتنومادەني بىرلەستىكتىڭ جەتەكشىلەرى دە قۇتتىقتاپ ءوتتى. وزبەكتەر ءۇشىن ناۋرىزدىڭ ەڭ باستى تاعامدارىنىڭ ءبىرى بولىپ سانالاتىن «سۋمالياك» تاعامى قوناقتارعا تاراتىلدى. بۇل تاعام وڭدەۋدەن وتكىزىلگەن بيداي، ۇلكەن قازانعا ماقتا مايى قىزدىرىلىپ، وعان دايىن ونىممەن بىرگە ۇن سالىنىپ ازىرلەنەدى. كەش قوناقتارى، سونداي- اق، شىعىس اسحاناسىنىڭ تاعامدارى مەن ناۋرىز كوجەدەن دە ءدام تاتتى.
مەرەكەلىك كەشتىڭ سوڭىندا وزبەك ەتنوسىنىڭ سالتى- داستۇرلەرى كورسەتىلىپ، وڭتۇستىك قازاقستان وبلىسىنداعى وزبەك دياسپوراسىنىڭ وكىلى، «نيك» پروديۋسەرلىك ورتالىعىنىڭ مەڭگەرۋشىسى قاحرامون بۇحاربايەۆ وتانداستارىنا جىلى لەبىزىن ءبىلدىرىپ، مۋزىكالىق ءان شاشۋىن تارتۋ ەتتى.
اۆتور: ەلۋباي اۋەزوۆ
