قازاقستان پرەزيدەنتى ب ا ءا پرەمەرىن ەكسپو كورمەسىنىڭ اشىلۋىنا شاقىردى

استانا. قازاقپارات - قازاقستان پرەزيدەنتى نۇرسۇلتان نازاربايەۆ بىرىككەن اراب امىرلىكتەرىنىڭ ۆيتسە-پرەزيدەنتى، پرەمەر-ءمينيسترى، دۋباي امىرلىگىنىڭ بيلەۋشىسى، شەيح مۇحاممەد بەن راشيد ءال ماكتۋممەن كەزدەستى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

كەلىسسوز بارىسىندا تاراپتار ەكى ەل اراسىنداعى ىنتىماقتاستىقتىڭ قازىرگى احۋالى مەن ونى بۇدان ءارى دامىتۋ جايىن تالقىلادى. اتاپ ايتقاندا، ساۋدا-ەكونوميكا، قارجى جانە ينۆەستيتسيا سالالارىنداعى ءوزارا ءىس-قيمىل ماسەلەلەرى قارالدى.

مەملەكەت باسشىسى دۋباي حالىقارالىق قارجى ورتالىعى (DIFC) مەن دۋباي قالاسىنىڭ قارقىندى دامىپ كەلە جاتقانىن اتاپ ءوتتى.

نۇرسۇلتان نازاربايەۆ قارجى ورتالىعىن قۇرۋ جانە ونى ءتيىمدى باسقارۋ تۇرعىسىنان بىرىككەن اراب امىرلىكتەرىمەن تاجىريبە الماسۋدىڭ ماڭىزدىلىعىنا، سونداي-اق DIFC پەن استانا حالىقارالىق قارجى ورتالىعى اراسىندا تىعىز قارىم-قاتىناس ورناتۋ قاجەتتىگىنە توقتالدى.

دۋباي امىرلىگىنىڭ بيلەۋشىسى بۇل باعىتتا ءىس-قيمىل ورناتۋعا تولىق دايىن ەكەنىن جەتكىزدى. قازاقستان پرەزيدەنتى يسلامدىق قارجىلاندىرۋ ءىسىن دامىتىپ، ونى ەنگىزۋگە ايرىقشا ۇلەس قوسقانى ءۇشىن شەيحقا العىس ءبىلدىردى.

بۇدان بولەك، مەملەكەت باسشىسى «ەكسپو-2017» حالىقارالىق مامانداندىرىلعان كورمەسىنە دايىندىقتىڭ اياقتالعانىن، كەيىننەن كورمە نىساندارى استانا حالىقارالىق قارجى ورتالىعىنىڭ جۇمىسى ءۇشىن پايدالانىلاتىنىن ايتتى.

كەزدەسۋ سوڭىندا نۇرسۇلتان نازاربايەۆ بىرىككەن اراب امىرلىكتەرىنىڭ پرەمەر-ءمينيسترىن استاناداعى «ەكسپو-2017» كورمەسىنىڭ اشىلۋىنا شاقىردى.