وڭتۇستىك كورەيا ۆيتسە-پرەمەرى قازاقستانعا ساپارلايدى

استانا. قازاقپارات - وسى اپتادا وڭتۇستىك كورەيا پرەمەر-ءمينيسترىنىڭ ورىنباسارى، ءبىلىم ءمينيسترى لي چجۋن سيك ورتالىق ازياعا ساپارى اياسىندا قازاقستان مەن وزبەكستاندا بولادى، دەپ حابارلايدى قازاقپارات.

Yonhap اگەنتتىگىنىڭ مالىمەتىنشە، بۇل ساپار وڭتۇستىك كورەيا مەن ەلىمىز اراسىندا ديپلوماتيالىق قاتىناستاردىڭ ورناۋىنىڭ 25 جىلدىعىنا، سونداي-اق ەتنيكالىق كورەيلەردىڭ قونىستانۋىنىڭ 80 جىلدىعىنا ورايلاستىرىلىپ جاسالماق.

لي چجۋن سيكتىڭ ساپارى ءتورت كۇنگە جالعاسادى دەپ كۇتىلۋدە. ول ەكى ەلدىڭ جوعارى لاۋازىمدى شەنەۋنىكتەرىمەن كەلىسسوزدەر جۇرگىزىپ، ستراتەگيالىق سەرىكتەستىك قاتىناستاردى نىعايتۋ ماسەلەلەرىن تالقىلاماق.

سونىمەن قاتار پرەمەر-ءمينيستردىڭ ورىنباسارى قازاقستان مەن وزبەكستاندا ءومىر ءسۇرىپ جاتقان كورەي حالقىنىڭ وكىلدەرىمەن كەزدەسەدى. قازاقستان مەن وزبەكستان سايكەسىنشە 100 مىڭ جانە 180 مىڭ ەتنيكالىق كورەيلەردىڭ تۋعان جەرى بولىپ تابىلادى.

«19-عاسىردىڭ سوڭىندا كەدەيشىلىككە تاپ بولعان كورەي فەرمەرلەرى ورتالىق ازيا وڭىرلەرىنە قونىس اۋدارا باستادى، ال كەيىننەن، ولارعا 1910-1945-جىلدارى جاپونيانىڭ وتارلىق باسقارۋىنا قارسى تۇرعان، تاۋەلسىزدىك ءۇشىن كۇرەسكەن كەيبىر ادامدار قوسىلدى. مۇنىمەن قوسا، 1937-جىلى يوسيف ستاليننىڭ بۇيرىعىمەن سىبىردە تۇرىپ جاتقان كورەيلەر دە ورتالىق ازياعا جاپپاي جەر اۋدارىلدى»، - دەپ جازادى اگەنتتىك.

اۆتور: رۋسلان عابباسوۆ