ەكزوتيكالىق بالىقتار بالالار تاعامى ءۇشىن پايدالى - بالىق ءوسىرۋشى - كەسكىن

تالدىقورعان. قازاقپارات - الماتى وبلىسىنىڭ ۇيعىر اۋدانىندا افريكا بالىقتارى جەرسىندىرىلە باستادى.

تيلياپيا جانە افريكالىق جايىن وسى اۋداندا جەر استىنان شىعاتىن ىستىق قاينارلاردا وسىرىلۋدە. شارۋا يەسىنىڭ سوزىنشە، بۇل بالىق تۇرلەرى اسىرەسە بالالار تاعامى ءۇشىن پايدالى.

سەبەبى، قىلتاناعى از، دەپ حابارلايدى قازاقپارات ءتىلشىسى.

2015-جىلى ىسكە قوسىلعان شارۋاشىلىق ايىنا 1,5 تونناعا جۋىق بالىق ەتىن وبلىس اۋماعىنا جانە الماتى قالاسىنا وتكىزىپ كەلەدى.

تاپسىرىستىڭ باسىم بولىگى مەيرامحانالاردان تۇسەدى ەكەن. اتالعان تىرشىلىك يەسى 28-29 گرادۋس نولدەن جوعارى تەمپەراتۋرادا ەمىن-ەركىن ءومىر سۇرەدى. سەبەبى تيلياپيانىڭ نەگىزگى وتانى افريكا جانە تروپيكتىك ەلدەر.

قازىرگى شارۋاشىلىقتا 12 مىڭ باس تيلياپيا مەن 17 مىڭ باس افريكا جايىنى وسىرىلۋدە. سونداي- اق كاسىپورىندا 500 مىڭنان اسا شاباق بار. بۇل بالىقتاردىڭ ءبىر ەرەكشەلىگى جارتى جىلدا تاۋارلى سالماعىنا جەتىپ، ساتۋعا جارامدى بولادى.

ەكزوتيكالىق بالىق تۇرىنە سۇرانىس تا جوعارى. سالىستىرمالى تۇردە قىتاي ەلىندەگى بالىق ەكسپورتىنىڭ 50 پايىزى، يزرايلدە 40 پايىزىن وسى تيلياپيا قۇراپ وتىر.

«باسقا بالىقتارعا قاراعاندا افريكالىق جايىن (افريكانسكي سوم) وتتەگىنى اسا كوپ قاجەت ەتپەيدى. 1 ليتر سۋعا 3-5 م گ وتتەگى جەتىپ جاتىر. ءدال وسىنداي ورتادا بۇل بالىقتار تاۋلىگىنە 3-4 گرام سالماق قوسىپ وتىرادى. ال تەلياپيا ءۇشىن وتتەگى اسا قاجەت. 1 ليتر سۋدا كەمىندە 8 م گ وتتەگى بولۋى ءتيىس. بۇل تىرشىلىك يەلەرىنىڭ قىلتاناعى از. بالالار تاعامى ءۇشىن جاقسى دەپ ايتقىم كەلەدى» دەيدى كاسىپورىننىڭ باسقارۋشى ديرەكتورى يالكۋنجان يۋنۋسوۆ.

مامانداردىڭ ايتۋىنشا، بۇل بالىقتىڭ وزگە بالىقتان ءدامى دە، ءتۇسى دە وزگەشە. ءتىپتى كەي ەلدەردە تيلياپيانى سۋ تاۋىعى دەپ تە اتايدى. سەبەبى ەتىنىڭ ءدامى تاۋىق ەتىنە جاقىن.

اۆتور: سامال قابىشەۆا