تۇركىستاندا وتكەن الامان ايتىستا ايبەك قاليەۆ جەڭىمپاز اتاندى

شىمكەنت. قازاقپارات - تۇركىستاندا وتكەن الامان ايتىستىڭ جەڭىمپازدارى بەلگىلى بولدى.

تۇركى تىلدەس مەملەكەتتەر اراسىنداعى ۇيىمداستىرىلعان جىر دوداسىندا باس جۇلدەگە قوستاناي وبلىسىنىڭ اقىنى ايبەك قاليەۆ يە بولدى.

وعان ارنايى العىس حات پەن 3 ميلليون تەڭگەنىڭ سەرتيفيكاتى تابىستالدى، دەپ حابارلايدى قازاقپارات ح ا ا ءتىلشىسى.

ايتا كەتەيىك، ەكى كۇنگە سوزىلعان الامان ايتىستا اتى التى الاشقا ءمالىم قىرعىزستان، وزبەكستان، تۇركيا جانە قازاقستان ەلدەرىنىڭ 20 اقىنى قاتىستى. ولاردىڭ اراسىندا كورشى قىرعىز ەلىنەن اسىلبەك ماراتوۆ پەن بولوت نازاروۆ كەلسە، قۇلماحان دۇيسەنوۆ وزبەكستان رەسپۋبليكاسىنان قاتىستى.

ال، سارا توقتامىسوۆا (استانا قالاسى)، سىرىم اۋەسحان (استانا قالاسى)، ايبەك قاليەۆ (قوستاناي وبلىسى)، بوتاگوز مۇحيددين قىزى (قاراعاندى وبلىسى)، التىنكۇل قاسىمبەكوۆا (جامبىل وبلىسى)، بيبىگۇل تىلەپالدينوۆا (الماتى قالاسى)، بەكارىس شويبەكوۆ (و ق و)، جارقىنبەك ناۋشابەكوۆ (و ق و)، كاريما ورالوۆا (و ق و)، قاجىمۇحان ابزالوۆ (و ق و)، ءبىرجان بايتۋوۆ (و ق و)، نۇرلان ەسەنقۇلوۆ (و ق و)، انار جاپپارقۇلوۆا (و ق و)، داۋرەن پولاتبايەۆ (و ق و)، نۇرلىبەك مەيىرمانوۆ (و ق و)، تۇرار تىلەۋليەۆ (و ق و)، نۇرعالي ءاناپيا (و ق و) سىندى 12 اقىن ەلدىڭ اتىنان شىعىپ، ايتىستى.

اقىندار ەلدىڭ بىرلىگى مەن ىنتىماعى، باۋىرلاس ەلدەر اراسىنداعى بەرىك ىمىرا مەن اۋىزبىرشىلىك جايىندا كەڭىنەن جىرلاي كەلە، قاعىتپا ءازىل، قيسىننان جول تاپقان تاپقىرلىقتارىمەن ەلدىڭ ىقىلاسىنا بولەندى.

قازىلار القاسىنىڭ شەشىمىمەن ايتىستىڭ ءبىرىنشى ورنى وڭتۇستىك قازاقستان وبلىسىنىڭ اقىنى جارقىنبەك ناۋشابەكوۆكە بۇيىرىپ، ول 2 ميلليون تەڭگە كولەمىندەگى سىيلىقتى يەلەندى. سونىمەن قاتار، قىرعىزستان رەسپۋبليكاسىنان كەلگەن اسىلبەك ماراتوۆ پەن وڭتۇستىك قازاقستاندىق نۇرلان ەسەنقۇلوۆتار ەكىنشى ورىنعا لايىق دەپ تانىلدى.

قوس اقىن دا 1,5 ميلليون تەڭگەدەن جەڭىپ الدى. قىرعىز اقىنى بولوت نازاروۆ پەن ارقا جۇرتىنىڭ ارقالى اقىندارى سارا توقتامىسوۆا مەن سىرىم اۋەسحان ءۇشىنشى ورىندى يەمدەندى. ولارعا دا اقشالاي سىيلىق رەتىندە 1 ميلليون تەڭگەنىڭ سەرتيفيكاتى بەرىلدى.

بۇدان بولەك، «قازىبەك ءبي» اتىنداعى ارنايى جۇلدە انار جاپپارقۇلوۆانىڭ ەنشىسىنە تيەسىلى بولسا، «تۇركسوي» ۇيىمى اتىنداعى جۇلدە تۇركىستاننىڭ ازۋلى اقىنى بەكارىس شويبەكوۆكە بۇيىردى.

الامان ايتىستا ايرىقشا ءسوز ساپتاعان اقىندار ءبىرجان بايتۋوۆ پەن قاجىمۇقان ابزالوۆ جانە نۇرعالي ءاناپيالارعا ارنايى جۇلدە رەتىندە 500 مىڭ تەڭگەدەن تابىستالدى.

ەسكە سالايىق، «تۇركىستان - تۇركى الەمىنىڭ مادەني استاناسى» جىلى اياسىندا وتكەن ايتىس قازىبەك ءبي كەلدىبەك ۇلىنىڭ 350 جىلدىعىنا جانە «ناۋرىز» مەيرامىنا وراي ۇيىمداستىرىلدى.

ق. ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ مادەنيەت ورتالىعىندا وتكەن ايتىستىڭ قۇرىلتايشىسى - قازاقستان رەسپۋبليكاسىنىڭ مادەنيەت جانە سپورت مينيسترلىگى مەن تۇركسوي حالىقارالىق ۇيىمى، و ق و اكىمدىگى مەن ءوڭىردىڭ مادەنيەت باسقارماسى بولدى.

اۆتور: اينۇر اقبايەۆا