بايقوڭىر ناۋرىز مەيرامىن اتاپ ءوتتى

قىزىلوردا. قازاقپارات-  ۇلىستىڭ ۇلى كۇنىن مەرەكەلەۋ جالعاسۋدا.

جۇلدىزدى قالاشىقتىڭ تۇرعىندارى بيىلعى جىلى دا ناۋرىز مەرەكەسىن جوعارى دەڭگەيدە اتاپ ءوتتى، دەپ حابارلادى قازاقپارات ح ا ا ءتىلشىسى قارماقشى اۋداندىق اكىمدىگىنە سىلتەمە جاساپ.

ورتالىق الاڭدا كيىز ۇيلەر تىگىلىپ، ۇلتتىق سپورت تۇرلەرىنەن جارىستار ۇيىمداستىرىلدى. مەرەكەلىك شاراعا اۋدان اكىمى سۇلتان ماقاشوۆ، بايقوڭىر قالاسى اكىمشىلىگىنىڭ باسشىسى اناتولي پەترەنكو ارنايى قاتىسىپ، قالا تۇرعىندارىن مەرەكەمەن قۇتتىقتادى.

مۇنان كەيىن مەيماندار ورتالىق الاڭدا ۇيىمداستىرىلعان مەرەكەلىك ءتۇرلى شارالاردى تاماشالادى. بۇل كۇنى قالا تۇرعىندارى الداعى مولشىلىقتىڭ باستاۋى بۇگىنگى كۇنگى تاتۋلىقتا، ىنتىماق پەن بىرلىكتە، باۋىرمالدىقتا، ەڭبەكقورلىقتا ەكەنىن اتاپ ءوتىپ، ءبىر-بىرىنە ىزگى تىلەكتەرىن بىلدىرە، ءبىر كۇلشەنى ءبولىپ جەدى.

ناۋرىز كوجەسىن تاۋسىپ ءىشىپ، «ۇلىس وڭ بولسىن، اق مول بولسىن» دەپ باتا جاسادى.

اۆتور: ەلۋباي اۋەزوۆ